Աշխատանքային նոր օրենսգրքում գործատուներին ավելի քիչ կկարգավորեն եւ ավելի շատ հարցեր կթողնեն աշխատողների հետ բանակցությունների համար: Այս մասին NEWS.am-ի թղթակցի հետ զրույցում ասաց ՀՀ աշխատանքի եւ սոցիալական հարցերի փոխնախարար Արայիկ Պետրոսյանը՝ մեկնաբանելով օրենսգրքի նոր խմբագրության ուղղությամբ աշխատանքը:
Նման բանակցությունների հարցում միանգամայն հնարավոր թերահավատության մասին նկատառմանը Պետրոսյանը հակադարձեց. Հայաստանում 18% գործազրկության պայմաններում հարկ է մտածել, իսկ կյանքում ամեն ի՞նչ է օրենքով ընթանում: Այդ պատճառով կառավարությունը որոշել է աշխատանքային հարաբերությունների մի մասը թողնել պայմանավորվածության վրա: Եվ հենց այս դեպքում, ըստ Պետրոսյանի, շատ կարեւոր է, որպեսզի աշխատողը ոչ թե միայնակ համաձայնության գա, այլ արհմիության աջակցությամբ:
«Դժվար է ժխտել. շատ հաճախ (իհարկե՝ ոչ միշտ) իրավիճակի տերը մեզ մոտ գործատուն է: Բայց երբ նրա առջեւ կանգնի արհմիությունը, այդ դեպքում ամեն ինչ կփոխվի: Այդ դեպքում մենք հույս ունենք, որ աշխատողները կձգտեն կոլեկտիվ բանակցությունների»,- նշեց փոխնախարարը:
Արհմիություններ պետք է լինեն, թե՝ ոչ, պետք է որոշեն աշխատողները, այլ ոչ պետությունը, քանի որ արհմիությունը պետք է անկախ լինի:
«Շատերին թվում է՝ պետությունը կհրամայի, այդ ժամանակ էլ արհմիությունները կուժեղանան: Ադրբեջանում այդպես էլ եղավ: Ալիեւը հրամայեց՝ հայտնվեցին: Բայց ի՞նչ է դա նշանակում: Նշանակում է, որ արհմիություններն ազդեցության լծակ են պետության ձեռքում: Իսկ դրանք պետք է աշխատողների ձեռքում լինեն»,- պարզաբանեց փոխնախարարը:
