Երեւանում այսօր՝ մայիսի 26-ին, մեկնարկել է ոստիկանության ՊՊԾ գնդի գրավման գործին միացված` Ժիրայր Սեֆիլյանի, Ներսես Պողոսյանի, Գեւորգ Սաֆարյանի եւ մի քանի այլ անձանց դեմ հարուցված քրեական գործով դատավարության առաջին՝ արտագնա նիստը: NEWS.am-ի թղթակիցը հաղորդում է, որ դատարանում ուժեղացված հսկողություն է, այնտեղ է նաեւ Երեւանի փոխոստիկանապետ Վալերի Օսիպյանը: Դատարանում են «Երկիր Ծիրանի» կուսակցության առաջնորդ Զարուհի Փոստանջյանը, «Հիմնադիր խորհրդարանի» անդամ Ալեք Ենիգոմշյանը եւ «Ժառանգության» փոխնախագահ Արմեն Մարտիրոսյանը: Ժիրայր Սեֆիլյանին, Գեւորգ Սաֆարյանին եւ մյուսներին դատական նիստերի դահլիճում դիմավորել են ծափահարություններով եւ «Մահ ռեժիմին», «Ազատություն քաղբանտարկյալներին» վանկարկումներով:
Սեֆիլյանը ներկաներին ողջունեց բռունցքը վեր պարզած: Դատարանի դահլիճում էին նրա հարազատները, որոնք Սեֆիլյանի կալանավորումից ի վեր առաջին անգամ հնարավորություն ունեին նրան տեսնելու տեսակցությունների սահմանափակման պատճառով:
Նշենք, որ գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում: Դատավորն է Տաթեւիկ Գրիգորյանը: Սակայն նիստը արտագնա է եւ անվտանգության նկատառումներից ելնելով՝ ընթանում է Շենգավիթ վարչական շրջանի ընդհանուր իրավասության դատարանում, քանի որ այտեղ կա ապակեպատ դահլիճ:
Ըստ մեղադրանքի՝ Ժիրայր Սեֆիլյանը 2015թ. ապրիլի 24-ին Երեւանում բռնություն գործադրելով, գույք ոչնչացնելով եւ վնասելով, ինչպես նաեւ իշխանության ներկայացուցիչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, սկսած 2014 թվականի մայիսից կատարել է դրա կազմակերպմանն ուղղված նախապատրաստական գործողություններ: Բացի դրանից, 2015թ. նոյեմբերից մինչեւ 2016թ. մայիսի 18-ն ընկած ժամանակահատվածում, կազմակերպված խմբի կազմում ապօրինին կերպով ձեռք է բերել, պահել եւ փոխադրել հրազեն եւ ռազմամթերք, նպատակ ունենալով զենքի գործադրմամբ, կյանքի համար վտանգավոր բռնություն գործադրելով զավթել եւ պահել ռազմավարական նշանակության շենքեր, շինություններ, սակայն իր կամքից անկախ հանգանամքներով ավարտին չի հասցվել:
Այս գործի շրջանակում մեղադրանք է առաջադրված նաեւ Գեւորգ Սաֆարյանին: Ըստ մեղադրական եզրակացության՝ 2015թ. ապրիլի 24-ին Երեւանում բռնություն գործադրելով, գույք ոչնչացնելով եւ վնասելով, ինչպես նաեւ իշխանության ներկայացուցիչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, սկսած 2014 թվականի մայիսից կատարել է դրա կազմակերպմանն ուղղված նախապատրաստական գործողություններ:
Հրայր Թոփչյանին էլ մեղադրանք է առաջադրվել Սեֆիլյանի կողմից ստեղծված, զինված կազմակերպված խմբի կազմում հրազեն եւ ռազմամթերք ապօրինի պահելու եւ փոխադրելու մեջ: Հրայր Թոփչյանը, ըստ մեղադրանքի, գիտակցելով կամովին հրաժարվել է հանցագործության նախապատրաստությունից եւ անմիջականորեն հանցանք կատարելուն ուղղված գործողություններից, հրազեններն ու ռազմամթերքը Ժիրայր Սեֆիլյանին վերադարձնելու ժամանակ ենթարկվել է ավտովթարի, բացահայտվել ու բերման ենթարկվել ոստիկանության բաժին:
Սասունիկ Կիրակոսյանը, Հովհաննես Պետրոսյանն ու Գալուստ Գրիգորյանը նույնպես կամովին հրաժարվել են հանցագործության նախապատրաստությունից եւ անմիջականորեն հանցանք կատարելուն ուղղված գործողություններից:
Ժիրայր Սեֆիլյանին մեղադրանք է առաջադրվել Քրեական օրենսգրքի 35-225-րդ հոդվածի 1-ին մասով, 35-219-րդ հոդվածի 3-րդ մասի 1-ին կետով: Նա կալանավորված է:
Նշենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Հոդվածներից յուրաքանչյուրը նախատեսում է մինչեւ 10 տարվա ազատազրկում: