Մայիսի 25-ին Վիլնյուսի «Պասակա» կինոթատրոնում ՀՀ դեսպանությունը կազմակերպեց «Խոստում» ֆիլմի հատուկ դիտումը, որին մասնակցեցին Լիտվայում հավատարմագրված դեսպաններ, բազմաթիվ դիվանագետներ, օրենսդիր և գործադիր իշխանությունների ներկայացուցիչներ, լրագրողներ, մշակութային գործիչներ, հայ համայնքի ներկայացուցիչներ:
Ֆիլմի ցուցադրումից առաջ Լիտվայում ՀՀ դեսպան Տիգրան Մկրտչյանն իր խոսքում նշեց, որ առաջին անգամ է Հոլիվուդում նկարահանվում Հայոց ցեղասպանությանը նվիրված ֆիլմ, քանի որ բոլոր նախկին փորձերը Թուրքիայի իշխանությունների ճնշումների ներքո հաջողություն չեն ունեցել։ Ուստի ռեժիսոր Թերի Ջորջը և բոլոր նրանք, ովքեր ներգրավված են եղել ֆիլմարտադրության մեջ, հանդես են բերել դրվատանքի արժանի խիզախություն։
Դեսպանն ընդգծեց, որ «այնուամենայնիվ այս ֆիլմը միայն անցյալի մասին չէ։ Այն նաև մեր ներկային է վերաբերվում։ Այն չարիքին դիմադրելու, եղբայրասիրության և անմնացորդ սիրո մասին է»։ Դեսպանը հավելեց, որ «պատմությունն ապացուցեց, որ ի հեճուկս Ադոլֆ Հիտլերի հաճախ մեջբերվող գնահատականին առ այն, թե «ո՞վ է այսօր հիշում հայերի բնաջնջումը», այսօր պետք է ասել, որ ամբողջ աշխարհն է հիշում այն։ Ցեղասպանության հիշատակումը և ճանաչումն առաջ են մղվում կրթության միջոցով։ Եվ արվեստը, ներառյալ կինեմատոգրաֆիան, էական նշանակություն ունի ճանաչողության բարձրացման հարցում»։
Ֆիլմի ցուցադրությունից հետո կազմակերպվեց ընդունելություն:
