2017թ.-ի մայիսի 25-ին տեղի ունեցավ Յունիբանկի բաժնետերերի տարեկան ընդհանուր ժողովը, որում ամփոփվեցին նախորդ տարվա աշխատանքի արդյունքները եւ ներկայացվեցին հետագա պլանները:
Բանկի Խորհրդի նախագահ Գագիկ Զաքարյանն իր ելույթում առանձնացրեց հաշվետու տարվա կարեւոր ձեռքբերումները. «Յունիբանկը մեծ աշխատանք է տարել հաճախորդների սպասարկման որակի եւ մատուցվող ծառայությունների տեսականու բարելավման ուղղությամբ: Մեզ հաջողվեց տրամադրված վարկերի միջին օրական քանակը հասցնել ավելի քան 1000-ի: Արդյունքում` մանրածախ բիզնեսի շահույթը նախորդ տարվա համեմատ աճեց երկու անգամ»:
Յունիբանկը զգալիորեն բարելավել է նաեւ ակտիվների որակը, ինչի շնորհիվ Moody’s գործակալությունը բարձրացրել է բանկի վարկանիշը մինչեւ B2 մակարդակի` կայուն կանխատեսմամբ: Հաշվետու տարում Յունիբանկը 53%-ով ավելացրել է կապիտալը, այն հասցնելով 34,8 մլրդ ՀՀ դրամի, եւ այդպիսով կատարել ՀՀ Կենտրոնական բանկի նորմատիվի պահանջը:
Բարձր գնահատելով ներդրողների վստահությունը բանկի հանդեպ, 2016թ.-ին բանկի Խորհուրդը որոշում ընդունեց իր բաժնետերերին բաժնետոմսերի տեսքով վճարել միջանկյալ շահութաբաժիններ, որոնք համարժեք էին 12.9% տարեկան եկամտաբերությանը:
2016թ. -ին բանկի ակտիվները կազմել են 185.4 մլրդ ՀՀ դրամ` տարվա ընթացքում աճելով 17.2%-ով, իսկ պարտավորությունները, աճելով 11.2%-ով, կազմել են 150.5 մլրդ ՀՀ դրամ: Վարկային ներդրումներն աճել են 7.7%-ով եւ կազմել 118.6 մլրդ ՀՀ դրամ: Յունիբանկում ավանդների ծավալը կազմել է 114.8 մլրդ ՀՀ դրամ, որից 81%-ը բաժին է ընկել ֆիզիկական անձանց ժամկետային ավանդներին:
2016թ.-ին Յունիբանկը տոնեց իր 15-ամյա հոբելյանը: Այս տարիների ընթացքում Յունիբանկին հաջողվել է դառնալ այնպիսի բանկ, որին վստահում են 325 000 հաճախորդ եւ 200 բաժնետեր: Այսօր բանկն ունի 47 մասնաճյուղ, 52 պրոմո կետ եւ ներկայացուցչություն Ռուսաստանում:
Բանկի ուժեղ կողմերը եւ մրցակցային առավելությունները հնարավորություն են ստեղծում բիզնեսի հետագա աճի եւ շուկայում մասնաբաժնի մեծացման համար: Քառամյա ռազմավարական ծրագրի համաձայն, Յունիբանկի մանրածախ վարկավորման ծավալը կաճի 44%-ով, իսկ կորպորատիվ վարկավորմանը` 37%-ով: Այսպիսով, բանկը կավելացնի իր մասնաբաժինը մանրածախ եւ բիզնես վարկավորման ոլորտներում, համապատասխանաբար, շուկայի 13% եւ 10%-ով: Խորհրդի նախագահ Գագիկ Զաքարյանը նշեց, որ 2020թ.-ին բանկը նախատեսում է ապահովել 5 մլրդ ՀՀ դրամի շահույթ, որի նվազագույնը 50%-ը կբաշխվի որպես շահութաբաժին: Իսկ դա նշանակում է, որ էապես կբարձրանա բանկի ներդրումային գրավչությունը:
«Մենք երախտապարտ ենք ներդրողներին վստահության, հաճախորդներին` լոյալության եւ բանկի անձնակազմին` համատեղ աշխատանքի համար: Կրկնակի հաճելի է, երբ մեր բաժնետերերն ու հաճախորդները խորհուրդ են տալիս Յունիբանկն իրենց բարեկամներին եւ մտերիմներին` որպես վստահելի եւ շահավետ գործընկեր», - ամփոփեց իր խոսքը Գագիկ Զաքարյանը:
Հայաստանի բանկերի միությունը Յունիբանկի Խորհրդի եւ Վարչության նախագահներ Գագիկ Զաքարյանին եւ Վարդան Աթայանին պարգեւատրեց «Տիգրան Մեծ» հուշամեդալով: