ՀՀ ԿԱ ՊԵԿ Մաշտոցի հարկային տեսչության հարկային հսկողության բաժնի ավագ տեսուչ Գևորգ Բրուտյանի կողմից Երևանի Մալաթիա-Սեբաստիա վարչական շրջանի տարածքում գործող տնտեսվարող սուբյեկտներից կաշառք պահանջելու և անձամբ ստանալու դեպքի առթիվ հարուցված քրեական գործով նախաքննությունն ավարտվել է: Այս մասին NEWS.am-ի հարցմանն ի պատասխան հայտնել են ՀՀ Ազգային անվտանգության ծառայության մամուլի ծառայությունից:
Մեր հարցմանն ի պատասխան ԱԱԾ մամուլի ծառայությունից հայտնել են հետեւյալը. «Կատարված մեծածավալ քննչական գործողություների արդյունքում ձեռք բերված ապացույցների համակցության հիման վրա Գևորգ Բրուտյանին վերջնական խմբագրությամբ մեղադրանք է առաջադրվել իր սպասարկման տարածքում գործող տարբեր տնտեսվարող սուբյեկտների աշխատակիցներից թվով 7 դեպքով ընդհանուր 2 մլն 400 հազար դրամ կաշառք պահանջելու և անձամբ ստանալու համար (1 դեպքով` ՀՀ քրեական օրենսգրքի 311-րդ հոդվածի 1-ին մասով և 6 դեպքով` 311-րդ հոդվածի 3-րդ մասի 3-րդ կետով)։
Հաշվի առնելով, որ Գևորգ Բրուտյանին կաշառք տված անձինք աջակցել են հանցագործությունը բացահայտելուն, նախաքննության ընթացքում նրանց նկատմամբ քրեական հետապնդումը դադարեցվել է՝ գործուն զղջալու հիմքով։
Սույն քրեական գործով կազմվել է մեղադրական եզրակացություն, և գործը հանձնվել է դատավարական հսկողություն իրականացնող դատախազին՝ մեղադրական եզրակացությունը հաստատելու և դատարան ուղարկելու համար»:
Հիշեցնենք, որ 2016թ. հոկտեմբերի 15-ին Ազգային անվտանգության ծառայությունը հայտնել էր, որ կաշառք ստանալու պահին ձերբակալվել է ՀՀ կառավարությանն առընթեր Պետական եկամուտների կոմիտեի Մաշտոցի հարկային տեսչության հարկային հսկողության բաժնի ավագ տեսուչ Գ.Բ.-ն:
Ձեռք բերված նախնական տվյալների համաձայն, Գ.Բ.-ն իր կողմից ի պաշտոնե սպասարկվող տարածքում գործունեություն իրականացնող տնտեսվարող սուբյեկտներին իր լիազորությունների շրջանակում հովանավորելու, ստվեարային եղանակով աշխատելու համար նպաստավոր պայմաններ ստեղծելու, այդ թվում՝ ՀԴՄ կտրոնները պակաս տպելու, իրական շրջանառության ծավալները ցույց չտալու եւ հարկային օրենսդրության խախտումներին սահմանված կարգով չարձագանքելու դիմաց, նրանցից որպես կաշառք պահանջել եւ պարբերաբար ստացել է տարբեր չափերի գումարներ: