Մայիսի 26-ին Ն.Ս.Օ.Տ.Տ. Գարեգին Բ Ծայրագույն Պատրիարք եւ Ամենայն Հայոց Կաթողիկոսը ցավակցագիր է հղել Ղպտի Ուղղափառ Եկեղեցու պետ, Ալեքսանդրիայի Պապ եւ Համայն Աֆրիկայի Թավադրոս Բ Պատրիարքին` Եգիպտոսի Էլ Մինյա նահանգում Ս. Սամուել Խոստովանողի վանքի մոտակայքում ղպտի ուխտավորների վրա զինված հարձակման եւ երկու տասնյակից ավելի անմեղ անձանց սպանության առիթով, տեղեկացնում է Մայր Աթոռ Սուրբ Էջմիածնի տեղեկատվական համակարգը:
Ամենայն Հայոց Կաթողիկոսը Գերագույն հոգեւոր խորհրդի, Մայր Աթոռ Ս. Էջմիածնի միաբանության եւ Հայոց Եկեղեցու հավատացելոց անունից զորակցություն է հայտնել Թավադրոս Բ Պատրիարքին եւ Ղպտի Եկեղեցու հետեւորդներին:
Խստորեն դատապարտելով հարձակումները քրիստոնյաների վրա Վեհափառ Հայրապետը հայցել է Ամենողորմ Աստծուն` շուտափույթ ապաքինում պարգեւել վիրավորներին եւ երկնային օթեւաններում ընդունել զոհված հավատացելոց հոգիները: