Ազգային ժողովը չի լուծելու Ղարաբաղի հարցը, այլ Ազգային ժողովը նպաստելու է պառլամենտական հարթակում ղարաբաղյան հարցի հայանպաստ լուծմանը։ Այս մասին NEWS.am–ի հետ զրույցում ասել է ԱԺ փոխխոսնակ Էդուարդ Շարմազանովն՝ անդրադառնալով ղարաբաղյան խնդրի կարգավորման հարցում նոր խորհրդարանի դերակատարմանը։
«Ազգային ժողովը չի լուծելու Ղարաբաղի հարցը, այլ Ազգային ժողովը նպաստելու է պառլամենտական հարթակում ղարաբաղյան հարցի հայանպաստ լուծմանը։ Մինսկի խմբի հետ բանակցելու է մինչեւ 2018 թվականը նախագահը, դրանից հետո գործադիրի ղեկավարը։ Ինչ վերաբերում է պառլամենտի դերին, իհարկե, պառլամենտական դիվանագիտությունը պետք է իրականացվի Սահմանդրությամբ ու ԱԺ կանոնակարգով տրված լիազորությունների շրջանակում»,–ասել է Աժ փոխխոսնակը։
Անդրադառնալով հարցին, որ խնդրի կարգավորման վերջնական քվեարկությունը ամեն դեպքում տեղի է ունենալու խորհրդարանում, ասել է. «Ես կարծում եմ, որ դեռեւս վաղ է խոսել այդ մասին՝ հաշվի առնելով Ադրբեջանի ապակառուցողական քաղաքականությանը։ Այսօր իրականությունն այն է, որ Ադրբեջանը պատրաստ չէ կառուցողական բանակցությունների, մերժում է Միսնկի խմբի համանախագահության առաջարկները, նախկին պետքարտուղար Քերրիի եւ ՌԴ նախագահ Պուտինի առաջարկները Սանկտ–Պետերբուրգում, ինչի վառ ապացույցը Մինսկի խմբի համանախագության կոշտ արձագանքն էր։ Ես լավատես չեմ, որ տեսանելի ապագայում տեսնեմ Արցախի խնդրի վերջնական լուծոմը, բայց առանց Արցախի ժողովրդի կամքի որեւէ մեկը, այդ թվում Հայաստանի Հանրապետությունը իրավունք չունի լուծել այդ խնդիրը, խնդրի առանցքը Արցախի ժողովրդի կամարատահայտության պարտադիր լինելն է»,–ասել է պատգամավորը։
