Արցախում հակառակորդի արձակած կրակոցից պայմանագրային զինծառայող է զոհվել: 21-ամյա Արմեն Ռաֆիկի Հարությունյանը Մարտակերտի շրջանի Հաթերք գյուղից էր, ծառայության էր անցել 8 ամիս առաջ: Արմեն Հարությունյանն իրենից փոքր եղբայր ունի:
Երիտասարդ զինծառայողը վերջերս էր նշանվել: Հաթերքի համայնքապետը մեր թղթակցին պատմել է, որ Արմենն ու հայրը նույն զորամասում էին ծառայում, Հարությունյանների ընտանիքը սոցիալապես ծանր պայմաններում է ապրում:
Հանրապետական կուսակցությունը որոշել է Կարեն Կարապետյանի կառավարությանը հնարավորություն տալ՝ իրականացնել սկսած ծրագրերը: Էդուարդ Շարմազանովն ասել է՝ ընդհանուր առմամբ գոհ են Կարապետյանի կաբինետի աշխատանքից: Երեկ ուշ երեկոյան նախագահ Սերժ Սարգսյանի հրամանագրերով նախարարների մեծ մասը վերանշանակվել է պաշտոններում: Փոփոխություն կա միայն արդարադատության նախարարությունում. Արփինե Հովհաննիսյանը պաշտոն է ստանձնել Ազգային ժողովում, նրան էլ փոխարինեց Դավիթ Հարությունյանը: Նա, ի դեպ, այս նախարարությունը ղեկավարել է նաեւ 1998-2007 թվականներին: Այս պահին դեռեւս նշանակում չի եղել կոալիցիոն քվոտայով ՀՅԴ-ին հատկացված երեք պորտֆելներում: Թափուր են նաեւ առողջապահության, աշխատանքի եւ սոցիալական հարցերի, արտակարգ իրավիճակների, մշակույթի, սպորտի եւ երիտասարդության հարցերի նախարարների պաշտոնները:
Այսօր մեկնարկել է Ժիրայր Սեֆիլյանի գործով առաջին դատական նիստը: Դատարան եկածները ծափերով ու «Ազատություն քաղբանտարկյալներին» վարկարկումներով են դիմավորել Սեֆիլյանին: Նիստի մեկնարկից կարճ ժամանակ անց, սակայն, աղմուկ է բարձրացել: Նիստը անցկացվել է դատարանի ապակեպատ սրահում, իսկ դահլիճում նստածները չեն կարողացել լսել դատավորին ու փաստաբաններին եւ վրդովվել են: Դատական առաջին նիստը, ամեն դեպքում, հետաձգվել է: Պարզաբանել են, որ ոչ բոլոր փաստաբաններն են ներկա: Հիշեցնենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Հոդվածներից յուրաքանչյուրը մինչեւ 10 տարվա ազատազրկում է նախատեսում:
Միջադեպ է տեղի ունեցել նաեւ Զարուհի Փոստանջյանի՝ Երեւանի ավագանու ընտրությունների արդյունքները վիճարկելու պահանջով նիստի ընթացքում: Փոստանջյանը ներկայացրել է հայցադիմումը, սակայն դատավորն ընդհատել է: Փոստանջյանն էլ անմիջապես արձագանքել է՝ դատարանը պատվեր է կատարում: Նրան օգնության է հասել համակիրներից մեկը: Դատարանը որոշել է դահլիճից դուրս հրավիրել կնոջը, բայց վերջինը չի ենթարկվել: Արդյունքում վիճաբանություն է սկսվել Փոստանջյանի համակիրների ու դատական կարգադրիչների միջեւ, դատական նիստն էլ ընդմիջվել է:
Վրաստանի հետ սահմանային միանգամից երկու անցակետեր զրկվել են մաքսային ծառայության ղեկավարներից: Կաշառք ստանալու եւ կաշառքի միջնորդության կասկածանքով ձերբակալվել է «Բավրա»-ի մաքսակետի պետը: Այս գործով նաեւ մաքսային միջնորդական ծառայություն իրականացնող ընկերության տնօրեն է ձերբակալվել: Աշխատանքից ազատվել է նաեւ «Բագրատաշեն»-ի մաքսակետի պետը: Պետեկամուտների կոմիտեի մամուլի ծառայության տեղեկացմամբ՝ նա ազատվել է սեփական դիմումի համաձայն:
Վաշինգտոնում Թուրքիայի նախագահի թիկնապահների մասնակցությամբ միջադեպի շուրջ կրքերը չեն հանդարտվում: Ամերիկյան Կոնգրեսում նույնիսկ հատուկ լսումներ են կազմակերպվել: Կոնգրեսականները շեշտում են Էրդողանի թիկնապահների գործողություններին կոշտ արձագանքելու անհրաժեշտությունը: Օրենսդիրներից մեկը նույնիսկ առաջարկել է Թուրքիայի նախագահին արգելել ԱՄՆ այցելել:
Հիշեցնենք, որ մայիսի 17-ին Վաշինգտոնում Թուրքիայի դեսպանատան դիմաց Էրդողանի այցի դեմ խաղաղ բողոքի ակցիայի ընթացքում բախումներ էին գրանցվել ցուցարարների եւ Էրդողանի կողմնակիցների միջեւ: Թուրքայի նախագահի թիկնապահները հարձակվել էին ցուցարարների վրա, 11 մարդ, այդ թվում՝ մեկ ոստիկան, տուժել է, երկու անձ կալանավորվել է: Ամերիկյան լրատվամիջոցներում ծեծկռտուքը հրահրողների լուսանկարներն են հրապարակվել, անուններ են նշվել:
Մինչ այդ, Եվրոպայում սկանդալի կենտրոնում է հայտնվել Միացյալ Նահանգների նախագահը: Բրյուսելում ՆԱՏՕ-ի գագաթնաժողովին մասնակցող Դոնալդ Թրամփը կոպիտ եւ անհարգալից հրել է Չեռնոգորիայի վարչապետին՝ լուսանկարվելիս երկրների եւ կառավարությունների առաջնորդների առաջին շարքում կանգնելու համար: Դրանից հետո ԱՄՆ նախագահն ուղղել է պիջակն ու պաշտոնական տեսք ընդունել: Դուշկո Մարկովիչը նախ անակնկալի է եկել ու ապշել նման վերաբերմունքից, բայց ավելի ուշ լրագրողներին ասել է, թե չի էլ նկատել՝ ինչպես է Թրամփը հրել իրեն: Ասում է՝ սոցցանցերում է տեսել կատարվածի արձագանքը:
Ֆրանսիայում բնակելի շենքում բռնկված հրդեհի հետեւանքով հայեր են զոհվել: Դեպքը տեղի է ունեցել Մարսելում: Չորս հարկանի շենքի առաջին հարկում հրդեհ է բռնկվել, ընտանիքի անդամներից Արսեն Քոչարյանը շտապել է հարեւանին օգնելու: Այդ ընթացքում, սակայն, նրա ընտանիքի մյուս անդամները՝ Սամանտա Քոչարյանը, Արսեն Քոչարյանի կինն ու երեխան մահացել են: Արսեն Քոչարյանն այրվածքներով հիվանդանոց է տեղափոխվել: Արտգործնախարարության տեղեկացմամբ՝ Քոչարյանները Հայաստանի քաղաքացի էին:
Հայաստանի դպրոցներում այսօր նշեցին ավարտական դասարանների աշակերտների համար ուսումնական տարվա ավարտն ազդարարող «Վերջին զանգ»-ը: Հիմնական դպրոցների ավարտական 9-րդ դասարաններն այս տարի 29.642 շրջանավարտ ունեն, ավագ եւ միջնակարգ դպրոցների 12-րդ դասարանները՝ 19.618 շրջանավարտ: Դպրոցների մեծ մասում այսօր տոնական միջոցառումներ են կազմակերպվել, մի քանի կրթօջախներում, սակայն, «վերջին զանգ» չի հնչել. շրջանավարտներ չունեն: Արդեն երեկոյան Ազատության հրապարակում «Վերջին զանգ»-ի առիթով ավանդական տոնական համերգն է կազմակերպվել: Բայց շրջանավարտները դեռ լուրջ անելիք ունեն. հունիսի 2-23-ին ավարտական եւ պետական ավարտական քննություններն են:
Ամերիկյան արժույթի արժեզրկումը չի դադարում, թուլացել են նաեւ ռուբլին եւ ֆունտը: Դոլարի փոխարժեքն այսօր արդեն կազմել է 481 դրամ, եվրոյինը՝ 540, ռուբլունը՝ 8 դրամ 50 լումա, ֆունտինը՝ 619 դրամ:
Մայիսի 27-ին հանրապետության շրջանների մեծ մասում սպասվում է անձրեւ եւ ամպրոպ: Օդի ջերմաստիճանը 2-3 աստիճանով կբարձրանա: Երեւանում նույնպես երեկոյան ժամերին տեղումներ են սպասվում: Մայրաքաղաքում գիշերը կդիտվի +12+14, ցերեկը՝ +24+26 աստիճան տաքություն: