Կենտրոնական կլինիկական զինվորական հոսպիտալում ուղիղ մեկ ամիս անգիտակից վիճակում գտնվող ժամկետային զինծառայող 20–ամյա Դավիթ Թադեւոսյանի վիճակը շարունակում է մնալ ծանր:
Հիշեցնենք, որ Դավիթ Թադեւոսյանը անգիտակից վիճակում Ստեփանակերտից ուղղաթիռով Երեւան է տեղափոխվել մայիսի 1–ին։ Նա Արարատի մարզի Եղեգնավան գյուղից է, ծառայում է Հադրութում։ Թե ինչի հետեւանքով է 20–ամյա զինծառայողը հայտնվել ծայրահեղ ծանր վիճակում, բժիշկներին դեռեւս չի հաջողվում պարզել։ Զինծառայողի մայրը՝ Հասմիկ Թադեւոսյանը մեր նախորդ հոդվածում («20–ամյա զինծառայողը երկու շաբաթ է՝ անգիտակից վիճակում է, պատճառն անհայտ է») NEWS.am–ի հետ զրույցում պնդել էր, որ որդին ծառայության ընթացքում երբեւէ չի գանգատվել առողջական վիճակից։ Դավիթի առողջական վիճակը կտրուկ վատացել է ապրիլի 27-ին, զորաամսում, նա ջերմել է ու տեղափոխվել Ստեփանակերտ, որտեղ երեք օր մնալուց հետո ցնցումներ է ունեցել, որից հետո նրան տեղափոխել են Երեւան, նախ՝ «Էրեբունի» բժշկական կենտրոն, մայիսի 4–ից Կենտրոնական կլինիկական զինվորական հոսպիտալ։
Ըստ բժիշկների եզրակացության՝ նրա մոտ ախտորոշվել է էպիլեպտիկ ստատուս:
Հոսպիտալի վերակենդանացման բաժանմունքի պետ Գայանե Հովհաննիսյանը NEWS.am-ի հետ զրույցում ասաց, որ Դավիթ Թադեւոսյանի վիճակը շարունակում է մնալ ծայրահեղ ծանր: Մինչ օրս բժիշկներին չի հաջողվել պարզել՝ ինչի հետեւանքով է զինծառայողը հայտնվել այդ վիճակում:
«Վիճակը կայուն է, սակայն դեռ մնում է ծայրահեղ ծանր: Որոշ հետազոտությունների տվյալներ ավելի լավ է, քան նախկինում, բայց ցնցումները դեռեըս շարունակվում են, ավելի քիչ են, բայց շարունակվում են: Պատճառը չենք կարողանում իմանալ, բայց այս էտապում դա այդքան էլ հետաքրքրիր չէ, որովհետեւ ինչ էլ որ լինի, միեւնույն է պիտի ստանա հակացնցումային բուժում, ինչպես նաեւ հետագա բարդությունների կանխարգելման բուժում: Էպիստատուսը կարղ էր այդպես էլ սկսվել, ոչ մեկ չի կարող ասել: Ամեն դեպքում, բուժումները կատարվում են՝ բոլոր խնդիրները հաշվի առնելով»,-ասաց Գայանե Հովհաննիսյանը:
Նշենք, որ 20-ամյա զինծառայողը զորացրվելու է հուլիսին: