Բրյուսելում մայիսի 29-ին Հայաստանի հետ լինելու է մարդու իրավունքների վերաբերյալ երկխոսություն, որի ժամանակ քննարկվելու են տարբեր հարցեր: Այս մասին այսօր՝ մայիսի 27-ին, լրագրողների հետ զրույցում ասաց ՀՀ-ում Եվրամիության պատվիրակության ղեկավար Պյոտր Սվիտալսկին՝ պատասխանելով Հայաստանի Ազգային ժողովում մարդու իրավունքների հանձնաժողովը պետաիրավական հարցերի մշտական հանձնաժողովին միացնելու մասին հարցին:
«Մենք ուրախ ենք փաստել, որ որոշ ոլորտներում կա առաջընթաց, բայց մենք կօգտվենք այս երկխոսությունից՝ բարձրացնելու այն ոլորտները, որտեղ մեր կարծիքով լրացուցիչ առաջընթացի կարիք կա: Դուք հիշատակում եք Ազգային ժողովի ներքին հանձնաժողովներից մեկը, սրանք ԱԺ ինքնավար որոշումներն են, իշխող կոալիցիայի որոշումներն են: Մենք կխրախուսենք ԱԺ-ին մարդու իրավունքների հարցը ներառել իրենց օրակարգում»,- ասաց դեսպանը:
ԵՄ պատվիրակության ղեկավարը նշեց, որ նախորդ շաբաթ, երբ Եվրախորհրդարանի արտաքին գործերի հանձնաժողովը Երեւանում էր, Ազգային ժողովում հանդիպման ժամանակ ԵԽ պատգամավորները բարձրացրել են Հայաստանում մարդու իրավունքների մասին հարցերը, իսկ արտաքին գործերի հանձնաժողովի նախագահն էլ իր հերթին առաջարկներ ու կոչեր է արել ԱԺ նախագահին, փոխնախագահին եւ խմբակցությունների ղեկավարներին:
«Այս կոչերը մեծ մասամբ վերաբերում էին մարդու իրավունքների ոլորտներին, մասնավորապես ընտանեկան բռնության դեմ օրենքին, առանց խտրականության օրենքին եւ այլ օրենքների: Այսինքն, Եվրախորհրդարանի հանձնաժողովի այցի ժամանակ պարզ դարձան մի շարք առաջնահերթություններ, որոնք պետք է ներգրավվել ԱԺ օրակարգում: Մեզ համար կարեւորն այն օրենքների ընդունումն է, որոնց հանձնառությունը Կառավարությունն ինքնուրույն է ստանձնել»,- ասաց Պյոտր Սվիտալսկին: