Արցախի անկախության ճանաչումը Ցեղասպանության ճանաչումից ավելի կարեւոր է։ NEWS.am-ի թղթակցի հետ զրույցում նման կարծիք հայտնեց «Հայաստան» համահայկական հիմանդրամի Տորոնտոյի (Կանադա) մասնաճյուղի ղեկավար Մկրտիչ Մկրտչյանը։
Մկրտիչ Մկրտչյանն ինքը Հայոց ցեղասպանության հետեւանքով որբացած մարդու զավակ է, այդ պատճառով Ցեղասպանության ճանաչումը նրա համար մեծ նշանակություն ունի։ Սակայն Մկրտչյանն ընդգծում է, որ իր համար ավելի մեծ նշանակություն ունի Արցախի անկախության ճանաչումը։
«Ցեղասպանությունը մեր անցյալն է, իսկ Արցախը՝ ապագան։ Հենց այդ պատճառով էլ ինձ համար շատ կարեւոր է Արցախի ճանաչումը»,- նշեց նա։
Մկրտիչ Մկրտչյանը հավելեց, որ Կանադայում, որտեղ ինքն ապրում է, լուրեր կարդացող բոլոր մարդիկ ինչ-որ չափով գիտեն Ցեղասպանության մասին։
«Բայց ես չեմ ցանկանում, որ հայերին ճանաչեն միայն Ցեղասպանությամբ։Ես ցանկանում եմ, որ ամբողջ աշխարհն իմանա՝ հայերը խելացի, տաղանդավոր մարդիկ են։ Ես ցանկանում եմ, որ ամբողջ աշխարհն իմանա անկախ Հայաստանի մասին։ Ես ցանկանում եմ, որ մոտ ապագայում Արցախը եւս անկախություն ձեռք բերի»,- նշեց նա։