Մենք հավատում ենք, որ կառուպցիայի դեմ պայքարի նոր մարմնի ստեղծումը լավ զարգացում է: Այսօր՝ մայիսի 27-ին, նման կարծիք հայտնեց Հայաստանում Եվրամիության պատվիրակության ղեկավար Պյոտր Սվիտալսկին՝ անդրադառնալով փորձագետների կարծիքին, թե այդ մարմնի կազմի ձեւավորումը ԱԺ-ի կողմից արդեն իսկ կասկածի տեղիք է տալիս:
«Որոշ ժամանակ է՝ Եվրամիությունը եւ ես անձամբ խրախուսում ենք նման մարմնի ձեւավորումը, եւ մեզ համար շատ կարեւոր է այդ կառույցի անկախությունը: Այլ երկրների փորձն ապացուցում է, որ նման կառույցն արդյունավետ է գործում, եթե այն անկախ է եւ չի կառավարվում որեւէ մեկի կողմից: Այսպիսով, մենք ողջունում ենք սա, որովհետեւ կարծում ենք, որ սա մեկ քայլ է դեպի առաջ: Բայց մենք այս մարմնի անկախության մասին կդատենք նրա գործողություններով: Չենք կարող կանխավ դատողություններ անել»,- ասաց Պյոտր Սվիտալսկին:
Հիշեցնենք, որ Կառավարությունը մայիսի 25-ին որոշել է կոռուպցիայի դեմ պայքարի նոր մարմին ստեղծել: Բարձրաստիճան պաշտոնյաների էթիկայի հանձնաժողովի հիմքի վրա կստեղծվի կոռուպցիայի կանխման մարմին: Այն կհետեւի պաշտոնեական էթիկային, շահերի վեճերին եւ պաշտոնյաներին ներկայացվող այլ պահանջներին: Կառույցը նաեւ եկամուտների հայտարարագրերը կընդունի:
Այս պահանջները կգործեն ոչ միայն բարձրաստիճան պաշտոնյաների, այլ նաեւ կոռուպցիայի բարձր պոտենցիալ ռիսկեր ունեցող ոլորտների աշխատակիցների համար՝ պետգնումներ, դատախազություն եւ քննչական մարմիններ: