Ընթացիկ ֆինանսական տարում ճապոնական առաջատար ավտոարտադրողները մոտ 2,85 տրլն իեն (25,5 մլրդ դոլար) կծախսեն անվարորդ կառավարման տեխնոլոգիաների զարգացման եւ էկոլոգիապես մաքուր մեքենաների սերունդ ստեղծելու համար: NHK հեռուստաալիքը հայտնում է, որ սա վերջին շրջանում ամենամեծ ցուցանիշն է:
Այսպես՝ Ճապոնիայում խոշորագույն Toyota ավտոկոնցեռնը այս նպատակով միանգամից 1,5 տրլն իեն (13,4 մլրդ դոլար) է հատկացրել: Honda-ն պատրաստվում է 750 մլրդ իեն (6,7 մլրդ դոլար) ծախսել՝ 9,4 տոկոսով ավելի, քան մեկ տարի առաջ: Տեխնոլոգիաների զարգացման համար ծախսերի ամենամեծ աճ է նախատեսել Subaru ընկերությունը: Այն բյուջեից կհատկացնի 134 մլրդ իեն (1,2 մլրդ դոլար), ինչը 17,3 տոկոսով ավելի է նախորդ ֆինանսական տարվա համեմատությամբ:
Որոշ ավտոարտադրողներ ծրագրել են համագործակցել սենսորների եւ խցիկների արտադրությամբ, նաեւ հաղորդակցության համակարգերով զբաղվող ընկերությունների հետ: Օրինակ՝ Honda-ն որպես գործընկեր ընտրել է Google ընկերությանը:
Ճապոնիայի կառավարությունը լրջորեն է վերաբերվում անվարորդ կառավարման տեխնոլոգիաների առաջընթացի հարցին: Իշխանությունները հույս ունեն, որ 2030 թվականին Ճապոնիայի ճանապարհներին յուրաքանչյուր 5-րդ մեքենան, գոնե մասնակի, կընթանա առանց վարորդի մասնակցության: Ակնկալվում է, որ 2020 թվականին անվարորդ մեքենաների վարումը կթույլատրվի երկրի մի քանի շրջաններում, իսկ 2025 թվականին ծրագրվում է ձեւավորել լիարժեք ներքին շուկա: