ԱՄՆ Հետաքննությունների դաշնային բյուրոն դեռեւս հունվարին բրիտանական Մի-5 հակահետախուզության ծառայությանը զգուշացրել է, որ Մանչեսթերում ահաբեկչության հեղինակ Սալման Աբեդին «Իսլամական պետություն» ահաբեկչական խմբավորման հյուսիսաֆրիկյան բջջի անդամ է եւ Մեծ Բրիտանիայում հարձակում է ծրագրել, հայտնում է Daily Mail պարբերականը՝ վկայակոչելով անվտանգության ոլորտի աղբյուրներին:
Դաշնային գործակալներն այս տեղեկությունը ստացել են Աբեդիի շփումները որսալու շնորհիվ: Պարբերականի տեղեկություններով՝ ՀԴԲ-ն Աբեդիին հետեւում էր 2016-ի կեսերից: «ԱՄՆ-ից ահազանգ ստանալով՝ Մի-5-ը բռնել է Աբեդիին եւ խմբավորման այլ անդամների: Այդ ժամանակ կարծում էին, որ նա ծրագրել է քաղաքական անձի մահափորձ: Սակայն քննությունը ոչ մի արդյունք չի տվել, եւ նրան, ցավոք, ձեռքից բաց են թողել»,- ասել է աղբյուրը:
Հիշեցնենք, որ «Մանչեսթեր արենա» մարզադաշտում մայիսի 22-ին Արիանա Գրանդեի համերգի ժամանակ մահապարտ ահաբեկչի պայթյունի հետեւանքով զոհվել է 22 մարդ, այդ թվում՝ 12 երեխա, 66 մարդ դեռեւս հիվանդանոցներում է, նրանցից 23-ի վիճակը ծայրահեղ ծանր է: Մի քանի մարդ անհետ կորած է համարվում: Ահաբեկչության պատասխանատվությունը ստանձնել է «Իսլամական պետություն» ահաբեկչական խմբավորումը:
