Ղարաբաղյան հակամարտության կարգավորման հիմքում պետք է լինեն Մադրիդյան սկզբունքները։NEWS.am -ի թղթակցի հետ զրույցում նման տեսակետ է հայտնել Բունդեսթագի պատգամավոր Քրիստոֆ Բերգները, որն այսօր՝ մայիսի 28-ին, Հայաստանի նախագահ Սերժ Սարգսյանի կողմից պարգեւատրվել է Մխիթար Գոշի շքանշանով՝ Օսմանյան կայսրությունում Հայոց ցեղասպանության միջազգային ճանաչման գործում իր ավանդի համար։

«Իմ կարծիքով բոլորս էլ պետք է հասկանանք, որ հենց Մադրիդյան սկզբունքները պետք է դրվեն այդ բարդ հակամարտության կարգավորման հիմքում։ Գերմանիան չի կարող լուծել այդ հակամարտությունը։ Այն պետք է կարգավորվի ԵԱՀԿ ՄԽ շրջանակում ու միայն բանակցությունների միջոցով»,- նշել է պատգամավորը։

Մադրիդյան սկզբունքները ղարաբաղյան հակամարտության կարգավորման հիմնական սկզբունքներն են, որոնք  ԵԱՀԿ ՄԽ-ն առաջարկել է հակամարտ կողմերին Մադրիդում 2007-ի նոյեմբերին։

Չնայած 2007-ից հետո հակամարտության կարգավորման գործում զգալի առաջընթաց չի ապահովվել, բայցեւայնպես մշակված առաջարկների արդիականությունը, շատ քաղաքական գործիչների ու քաղաքագետների կարծիքով, չի կորել։