ԵԱՀԿ Մինսկի խումբը դանդաղ, բայց հաստատակամորեն փոխում է դիրքորոշումը։ Այս մասին մայիսի 29-ին խորհրդարանում լրագրողների հետ զրույցում ասաց ՀՀ ԱԳ փոխնախարար Շավարշ Քոչարյանը։
Մայիսի 16-17-ին ղարաբաղյան հակամարտության գոտու շփման գծում միջադեպերի վերաբերյալ ԵԱՀԿ Մինսկի եռանախագահների (Ռուսաստան, Ֆրանսիա, ԱՄՆ) վերջին հայտարարությունում ադրբեջանական կողմն առաջին անգամ նշվեց որպես լարվածության նախաձեռնող։
«Փոփոխությունն այնպիսի ուժերի վարքագծում, ինչպիսին ՄԱԿ-ի Անվտանգության խորհրդի մշտական 3 անդամներն են, ժամանակ են պահանջում։ Նրանք հապաղում են, բայց դա լուրջ վտանգ է ներկայացնում խաղի կանոններին դեմ գնացող երկրի համար»,- նշեց Քոչարյանը։
Մեկնաբանելով ԵԱՀԿ Մինսկի խմբի ռուսաստանցի համանախագահ Իգոր Պոպովի՝ Կազմակերպության դիտորդների թիվը մեծացնելու անհրաժեշտության մասին հայտարարությունը, Քոչարյանը հիշեցրեց, որ հենց այդ մասին են պայմանավորվել Վիեննայի եւ Սանկտ Պետերբուրգի գագաթնաժողովներում։ «Իհարկե, դժվար է պնդել, որ դիտորդները լիովին կբացառեն միջադեպերը, բայց որքան նրանց թիվը շատ լինի, այնքան զսպող գործոնը, թեկուզ մի փոքր, ավելի բարձր կլինի»,- հավելեց Շավարշ Քոչարյանը։