ԱԺ փոխխոսնակ Արփինե Հովհաննիսյանը NEWS.am-ի հետ զրույցում վստահեցրել է, թե ԱԺ նոր աշխատասենյակը հիմնովին վերանորոգում է իր անձնական միջոցների հաշվին։ Նշենք, որ այս աշխատասենյակը նախկինում զբաղեցնում էր Արփինե Հովհաննիսյանի կուսակից ԱԺ նախկին փոխխոսնակ Հերմինե Նաղդալյանը, որտեղ տիկին Հովհաննիսյանը ցանկացել է տեղափոխվել միայն հիմնովին վերանորոգումից հետո։
NEWS.am–ն ավելի վաղ անդրադարձել էր այս աշխատասենյակի «կապիտալ» վերանորոգմանը։ Գրել էինք, որ անգամ տեղահան է արել աշխատասենյակի դռներն ու պատուհանները, ինչն արձանագրել էր մեր տեսախցիկը: Այսօր Արփինե Հովհաննիսյանը մեզ հետ զրույցում պնդեց, թե դա ընդամենը կոսմետիկ վերանորոգում է, որն իր միջոցներով է իրականացնում:
«Կապիտալ վերանորոգում չի կատարվում, իրականացվում է ընդամենը ընթացիկ վերանորոգում, կոսմետիկ վերանորոգում է, քանի որ չեք պատկերացնում, ես լուսավորեցի Ձեզ։ Ընթացիկ վերանորոգումը կատարվում է իմ հաշվին»,–ասաց Արփինե Հովհաննիսյանը։
Հարցին՝ ի՞նչն է ստիպել հիմնովին փոխել այն, Հերմինե Նաղդալյանի ճաշակը չի հավանե՞լ, պատասխանեց. «Էնտեղ որեւէ ճաշակի հարցի քննարկման ենթատեքստ չի եղել, էդպիսին է եղել իմ ցանկությունը»։
ՀՀԿ փոխխոսնակը վրդովվեց վերանորոգման ծախսերի վերաբերյալ մեր հարցից՝ պնդելով, թե դա լրագրողի գործը չէ:
Ինչ վերաբերում է աշխատասենյակի նախկին «տիրուհի» Հերմինե Նաղդալյանի արձագանքին, ապա մեզ հետ զրույցում վստահեցրել էր, թե իրեն բոլորովին չի վիրավորում երիտասարդ թիմակցի վերանորոգման աշխատանքները։