ԱԺ ՀՅԴ խմբակցության ղեկավար Արմեն Ռուստամյանը համամիտ չէ այն մեկնաբանությունների հետ, որ Սահմանադրությունը փոխվեց, որպեսզի Ազգային ժողովը ստանձնի ԼՂՀ խնդրի կարգավորման պատասխանատվությունը, մասնավորապես ազատագրված տարածքները հանձնելու պատասխանատվությունը։
«Ես դրա հետ համաձայն չեմ, որովհետեւ որեւէ մեկի մտքով չի անցնելու այդպիսի զիջման գնալ։ Կազանյան փաստաթղթղի մասին նախագահը խոսեց, որից շեղվել է Ադրբեջանը եւ որի սխալ մեկնաբանություններն է կատարել մինչեւ հիմա, բացահայտվեց որոշակի մանրամասներ, որը շատ օգտակար էր, հիմա ակնհայտ է, որ հայկական կողմերը շատ հստակ մի թեզի վրա են կանգնած, որ չի կարող ընդհանրապես որեւէ զիջման մասին խոսք գնալ, քանի դեռ Ադրբեջանը չի ճանաչել ինքնորոշման իրավունքի իրացումը»,–ասել է Արմեն Ռուստամյանը։
Դաշնակցական պատգամավորի խոսքով որոշումներ ընդունելու, այսպես ասած, ծանրության կենտրոնը ամբողջությամբ տեղափոխվում է Ազգային ժողով։
«Ազգային ժողովն այլեւս պետության մեջ միակ առաջնային մանդատ ունեցող մարմինն է լինելու եւ դրան էր ուղղված նախագահի խոսքը, որ այլես չպիտի սպասեն, որ նախագահականից ինչ–որ ցուցումներ ու ուղղորդումներ լինեն եւ եթե ինչ–որ հարցեր առաջանան Ազգային ժողով–կառավարություն, ամեն ինչ պետք է որոշվի Ազգային ժողովում, եւ այդ առումով խորհրդարանի դերը աննախադեպ է, դրա համար նաեւ մենք համարում ենք, որ սա հիմնադիր խորհրդարան է, որովհետեւ նոր համակարգի առաջին քայլերը կատարողն է եւ այս կազմով պետք է իրականացնի մեծ խնդիրների լուծումները»։
