ՀՀ ՊՆ N զորամասի պահպանության տեղամասի մարտական դիրքում մայիսի 10-ին հրազենային վիրավորումից մահացած ժամկետային զինծառայող, կրտսեր սերժանտ Գագիկ Մեսրոպյանին սպանելու կասկածանքով կալանավորված Արման Հակոբյանը երկու շաբաթ անց դեռ պաշտպան չունի, իսկ հարազատները չեն կարողացել տեսակցել նրան: NEWS.am-ի հետ զրույցում Արմանի եղբայրը՝ Ալիկը, նշեց, որ մինչեւ հիմա տեղեկություններ չունեն եղբորից, չեն տեսակցել նրան եւ անգամ չգիտեն՝ արդյոք նա ընդունո՞ւմ է իրեն առաջադրված մեղադրանքը, թե՞ ոչ:
Ըստ քննչական կոմիտեի՝ մեծածավալ քննչական գործողությունների արդյունքում պարզվել է, որ Գագիկ Մեսրոպյանը կյանքի համար վտանգավոր հրազենային վնասվածքն ստացել է իր ուղղությամբ դիտավորյալ արձակված կրակոցի հետեւանքով, բացահայտվել է առերեւույթ հանցագործություն կատարած անձի ինքնությունը, ով հանդիսանում է 1997թ. ծնված, նույն զորամասի պարտադիր ժամկետային զինծառայող:
Ձեռք բերված բավարար ապացույցների համակցությամբ՝ զինծառայողին մեղադրանք է առաջադրվել՝ ՀՀ քրեական օրենսգրքի 104-րդ հոդվածի 1-ին մասի հատկանիշներով: Նրա նկատմամբ որպես խափանման միջոց է ընտրվել կալանավորումը։
Նախաքննությունը շարունակվում է:
Նշենք, որ Գագիկ Մեսրոպյանին սպանելու կասկածանքով ձերբակալվածը Գորիսի Հարթաշեն գյուղի բնակիչ Արման Հակոբյանն է:
Ավելի վաղ տեղեկացրել էինք, որ սպանված զինծառայողը Տավուշի մարզի Տեղ գյուղի բնակիչ է, նա ընտանիքի միակ որդին էր, բնակվում էր մոր հետ՝ սոցիալական ծանր պայմաններում:
