Հայաստանը պատրաստ է սատարել էներգակիրների տարանցման անվտանգության ապահովման վերաբերյալ նախագծերը։ Այս մասին մայիսի 30-ին հայտարարել է ՀՀ էներգետիկ ենթակառուցվածքների եւ բնական ռեսուրսների փոխնախարար Հայկ Հարությունյանը՝ Աշխաբադի միջազգային էներգետիկ խարտիայում ելույթի ժամանակ, Թուրքմենստանի մայրաքաղաքից հաղորդում է NEWS.am-ի թղթակիցը։
Նա կոչ է արել կենտրոնանալ գաղափարի վրա, որ էներգետիկային հասանելիություն ունենալն արտոնություն չէ, այլ մարդու հիմնարար իրավունք։ «Էներգետիկայի հասանելիությունը դեռ խնդիր է աշխարհի շատ երկրներում։ Պետք է ավելի բազմակողմանի դարձնել էներգետիկ ռեսուրսների տարանցումը։ Եւ էնեգետիկ ռեսուրսների հետ կապված բոլոր նախագծերը պետք է ներառեն նաեւ էներգակիրների տարանցիկ մատակարարման անվտանգությունը»,-նշել է Հարությունյանը։ Նախարարն ընդգծել է, որ Հայաստանը պատրաստ է աշխատել աշխարհի բոլոր երկրների հետ՝ գազի եւ էլեկտրաէներգիայի տարանցումն ապահովվելու համար։
«Այժմ մենք աշխատում ենք Իրանի, Վրաստանի, Հայաստանի եւ Ռուսաստանի միջեւ միջանցք ստեղծելու ուղղությամբ։ Ներկայում Հայաստանում նաեւ էլեկտրաէներգիայի հոսքն ապահովելու համար ենթակառույցներ ստեղծելու տենդեր է հայտարարվել»,- հավելեց Հայկ Հարությունյանը՝ ֆորումի մասնակիցներին հրավիրելով մասնակցել մրցույթին:
