«Waagner & Biro Bridge Systems» շինարարական ընկերությունը ցանկություն է հայտնել իրականացնել Սպիտակ քաղաքում նախատեսվող կամրջի շինարարությունը։ Այս մասին մայիսի 30-ին, ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանի հետ հանդիպման ժամանակ նշել է «Waagner & Biro Bridge Systems»-ի վաճառքի տարածաշրջանային տնօրեն Օսվալդ Հաթերը:
Նախարարությունից NEWS.am-ին հայտնում են, որ կամրջաշինության ոլորտում «Waagner & Biro Bridge Systems» ընկերությունը շատ հարուստ փորձ ունի: Տարաբնույթ կառուցվածքներով, այդ թվում` նաեւ սեյսմակայուն, կամուրջներ է կառուցել աշխարհի տարբեր երկրներում։ Ընկերությունը ցանկություն է հայտնել իրականացնել Սպիտակ քաղաքում նախատեսվող կամրջի շինարարությունը։
Նախարարին ներկայացնելով կամրջի հնարավոր տարբերակները, նախատեսվող կառուցման եղանակները՝ Օսվալդ Հաթերն ընդգծեց, որ կարող են մեկ տարում կամրջի շինարարությունն ամբողջությամբ ավարտել։
Հանդիպման ընթացքում պայմանավորվածություն ձեռք բերվեց նախարարության մասնագետների հետ տեղում աշխատանքներին ծանոթանալուց հետո քննարկել համագործակցության հնարավորությունները։