Հայաստանում տրվող Halal սերտիֆիկատները կօգնեն Իրանի հետ առեւտրին։ Այս մասին մայիսի 31-ին լրագրողների հետ զրույցում ասաց Իրանի հանքային արդյունաբերության եւ առեւտրի փոխնախարար Մոջթաբա Խոսրովթաջը, որը գլխավորում է առեւտրի եւ ներդրումների շուրջ բանակցությունների նպատակով Երեւան ժամանած պատվիրակությունը։
Նրա խոսքով՝ Երեւանում արդեն գործում է իսլամական ստանդարտներով հավաստագրման Halal World կենտրոնը։ Եւս մեկ կենտրոնի բացումը շատ կօգնի իրանցի գործընկերների հետ հայկական ձեռնարկությունների աշխատանքին։ «Հայաստանում իրանական ընկերությունները շահագրգռված են առաջին հերթին գյուղմթերքի վերամշակմամբ, ինչպես նաեւ գյուղատնտեսական տեխնիկայի մատակարարմամբ, տեղեկատվական եւ բարձր տեխնոլոգիաների ոլորտում համագործակցությամբ, բանկերի եւ ապահովագրական ընկերությունների միջեւ կապերի ամրապնդմամբ»,-հավելել է Խոսրովթաջը։