Արցախում այսօր հակառակորդի արձակած կրակոցից ժամկետային զինծառայող է վիրավորվել: Ալիկ Ավանեսյանն աջ ազդրի ստորին հատվածում միջանցիկ վիրավորում է ստացել: Զինծառայողը Ստեփանակերտի հոսպիտալում է: Բժիշկները նրա վիճակը ծանր են գնահատում: Ավանեսյանին առայժմ չեն կարող Երեւան տեղափոխել:
Միաժամանակ, Արցախի պաշտպանության նախարարությունը հերքել է ադրբեջանական կողմի տարածած տեղեկությունները, թե, իբր, Արցախի պաշտպանության բանակի կրակակետ են ոչնչացրել: Ավելին, այս ընթացքում հրադադարի պահպանման ռեժիմի լուրջ խախտումներ չեն արձանագրվել:
Հին ավանդույթները նոր խորհրդարանում շարունակվում են: Խոսքն ուրիշի փոխարեն քվեարկելու մասին է: Ազգային ժողովի արտահերթ նիստում այսօր «Պետական պաշտոններ զբաղեցնող անձանց սոցիալական երաշխիքների մասին» օրենքում փոփոխությունների քվեարկության ժամանակ նիստերի դահլիճում խառնաշփոթ է սկսվել: Փաշինյանը նկատել է, որ Հանրապետական պատգամավորների շարքում բացակայողներ կան, բայց քվեարկել են բոլորը:
Վահրամ Բաղդասարյանը փորձել է բացատրել, թե իրականում ինչ է տեղի ունեցել: Բացատրությունը Փաշինյանին չի գոհացրել: Նիստը նախագահող Արա Բաբլոյանին երկար ժամանակ չի հաջողվել հանդարտեցնել ընդդիմադիր պատգամավորին: Ի վերջո Փաշինյանը զիջել է. փաստը հիմա կարձանագրեն, հետո խնդիրը կքննարկեն Էթիկայի հանձնաժողովում:
Փաշինյանն ակտիվ է եղել նաեւ քվեարկվող փոփոխությունների քննարկման ժամանակ: Պատգամավորը կարծում է, որ Քննչական կոմիտեում աշխատած, այնուհետեւ դատախազության համակարգ տեղափոխված ծառայողներին երկարամյա կենսաթոշակի անցնելու դեպքում արտոնյալ պայմաններ են տրվում: Փաշինյանը կարծում է, որ այստեղ դեր ունի Աղվան Հովսեփյանի գործոնը: Գեւորգ Կոստանյանը, սակայն, վստահեցնում է, որ խտրականության կամ արտոնյալ պայմանների մասին խոսք լինել չի կարող: Եթե որեւէ մեկը կարողանա ապացուցել այս կարծիքը, Կոստանյանը հրապարակային ներողություն կխնդրի:
Խորհրդարանի միջանցքներում էլ լրագրողների ուշադրության կենտրոնում էին «Ծառուկյան» դաշինքի նոր պատգամավորները: Գեւորգ Պետրոսյանը հաստատել է, որ հաշտվել է Նաիրա Զոհրաբյանի հետ, բայց նաեւ չի հերքել լրագրողների դիտարկումը, որ ժամանակին հրապարակային հայտարարություններ է արել Զոհրաբյանի մասին: Անձնական թշնամություն, սակայն, վստահեցրել է Պետրոսյանը, իրենց միջեւ չկա:
Ինտրիգներ չփնտրելու կոչ է արել նաեւ խմբակցության մյուս նորեկը՝ Նորա Առուստամյանը: Լրատվամիջոցներում լուրեր են պտտվում, որ Առուստամյանը Գագիկ Ծառուկյանի մտերիմ ընկերոջ դուստրն է, բացի այդ, խորհրդարանական ընտրություններին նրա հայրը՝ Սեդրակ Առուստամյանը, կես միլիոն դոլար է ծախսել ու այդպիսով խորհրդարանում դստեր համար տեղ ապահովել: Նորա Առուստամյանը հերքել է այս լուրերը:
Ազգային ժողովի այս արտահերթն ավարտվեց, կառավարության ներկայացրած բոլոր օրինագծերն ընդունվեցին: Եվս մեկ արտահերթ նիստ կգումարվի հունիսի 8-ին: Մինչ այդ, կառավարության կազմն ամբողջացել է: Նախագահ Սերժ Սարգսյանի հրամանագրերով վերանշանակվել են նաեւ մյուս նախարարները:
Հայաստան հազիվ թե Եվրոպայից ներդրումներ գան, քանի դեռ երկիրը չի լուծել դատարանների անկախության եւ կոռուպցիայի խնդիրները: Եվրամիություն-Հայաստան հարաբերություններին նվիրված քննարկման ժամանակ դեսպան Պյոտր Սվիտալսկին, միաժամանակ, նշել է, որ թեեւ 2013 թվականին Երեւանը նախապատվությունը ԵՏՄ-ին տվեց, ամեն դեպքում, Եվրամիությունը կշարունակի աջակցել: Դեսպանը հույս ունի, որ Հայաստան-Եվրամիություն շրջանակային համաձայնագիրը նոյեմբերին կստորագրվի:
Ինչ վերաբերում է վիզայի ազատականացմանը. հարցը դեռ օրակարգում է, բայց մոտ ապագայում Շենգենյան գոտի առանց վիզայի մուտքի հնարավորության հույս ունենալ պետք չէ: Դեռ մի շարք բաց հարցեր կան, որոնք դժվարացնում են գործընթացը: Եվրամիությունում նաեւ ակնկալում են, որ Հայաստանում վերջապես կընդունվի ընտանեկան բռնության կանխարգելման մասին օրենքը: Հարցին անդրադարձ է եղել նաեւ Բրյուսելում Եվրամիության եւ Հայաստանի միջեւ Մարդու իրավունքների շուրջ երկխոսության ամենամյա հանդիպման ժամանակ:
Երեւանում տղամարդը դանակահարել է նախկին կնոջ հորն ու փախուստի դիմել: 59-ամյա Ալբերտ Ջավահիրյանը ծանր վիճակում հիվանդանոց է տեղափոխվել: Նա կրծքավանդակի ձախ հատվածում կտրած-ծակած վերք ունի: Միջադեպը տեղի է ունեցել երեխայի տեսակցության շուրջ ծագած վիճաբանության արդյունքում: Տղամարդը 2 տարի առաջ ամուսնալուծվել է կնոջից: Երկու երեխաների՝ տղայի եւ աղջկա խնամակալությունը դատարանը մորն է հանձնել: Տեսակցությունների շուրջ, սակայն, մշտապես տարաձայնություններ են առաջացել: Դանակահարվածի հարազատներից մեկը մեր թղթակցին պատմել է, որ հայրն ուզում էր ինքը ստանձնել որդու խնամակալությունը, բայց մայրը չի համաձայնել: Տղամարդը մի անգամ նույնիսկ առանց զգուշացնելու երեխային տարել է մանկապարտեզից, հետո վերադարձրել էր: Կասկածյալին որոնում են:
Վանաձորում վերելակի հորանն ընկած երեխայի առողջական վիճակում դրական փոփոխություններ կան, բայց վիճակը դեռեւս ծանր է: Աղջկան Երեւան են տեղափոխել: 14-ամյա Լուսինե Զաքարյանը կոնքի երկու ոսկրի կոտրվածք, երկու ազդրի կոտրվածք, գլխուղեղի ցնցում ունի: Լուսինեի հետ է եղել նաեւ ընկերուհին, նա դեպքի մասին մանրամասներ է պատմել:
Պատահարի հանգամանքները պարզելու համար պատրաստվում են հատուկ հանձնաժողով ստեղծել: Մինչ այդ, սակայն, Վանաձորի քաղաքապետը տեղեկացրել է, որ վթարված վերելակը 5 ամիս առաջ է փորձաքննության ենթարկվել, որեւէ խափանում չեն հայտնաբերել:
ՀՖՖ նախագահ Ռուբեն Հայրապետյանն այսօր հերքել է տեղեկությունները, թե հեռանալու է Ֆեդերացիայի նախագահի պաշտոնից ու ընդհանրապես Հայաստանից: Այսօր նա լրագրողներին վստահեցրել է, որ չափազանց հայրենասեր է Հայաստանից հեռանալու համար, իսկ լրատվամիջոցներում նման լուրեր տարածողներն իր դեմ պատվեր են կատարում:
Նա անդրադարձել է նաեւ «Փյունիկ» ֆուտբոլային ակումբի վաճառքին՝ նշելով, որ դրանում ոչ մի սկանդալային բան չկա: Երբեք չի թաքցրել, որ վստահելի գնորդ գտնելու դեպքում կվաճառի երկար տարիներ իրեն պատկանող ակումբը: Նշենք, որ Ռուբեն Հայրապետյանի «Փյունիկ»-ը գնել է ռուսաստանաբնակ գործարար Արթուր Սողոմոնյանը: Նա պատրաստվում է փոփոխություններ անել ակումբում: Ամենայն հավանականությամբ, շուտով կփոխվի ակումբի անունը, կլինեն նաեւ կադրային փոփոխություններ: Արթուր Սողոմոնյանը նույնպես խոստացել է առաջիկայում հանդիպել լրագրողների հետ ու ակումբի ապագայի վերաբերյալ մանրամասներ ներկայացնել:
Այս տարի Հայաստանում հուլիսին եւ օգոստոսին բավական շոգ կլինի: Պատճառն Արաբական թերակղզուց ներթափանցող տաք հոսանքներն են: Ջերմաստիճանը հանրապետության որոշ հատվածներում կարող է նույնիսկ +42-ի հասնել: Իսկ մայիսի 29-ին Մոսկվայում մոլեգնած փոթորիկը Հայաստան չի ներթափանցի: Գագիկ Սուրենյանի տեղեկացմամբ՝ փոթորկաբեր քամին արդեն Սիբիր է հասել: Առաջիկա օրերին հանրապետությունում, հիմանականում երեկոյան ժամերին, կարող է ամպրոպ եւ քամու ուժգնացում դիտվել, բայց նման փոթորիկ մեր օդերեւութաբանները չեն կանխատեսում:
Դոլարն ու եվրոն նորից սկսել են թանկանալ: Արդյունքում մայիսի 31-ին դոլարի փոխարժեքը կազմել է 482 դրամ, եվրոյինը՝ 539, ռուբլունը՝ 8 դրամ 50 լումա, ֆունտինը՝ 617 դրամ:
Հունիսի 1-ին հանրապետության շրջանների մեծ մասում սպասվում է անձրեւ եւ ամպրոպ: Օդի ջերմաստիճանը 2-3 աստիճանով կնվազի: Երեւանում նույնպես երեկոյան ժամերին կարճատեւ տեղումներ կլինեն: Մայրաքաղաքում գիշերը կդիտվի +15+17, ցերեկը՝ +27+29 աստիճան տաքություն: