Միջազգային հանրությունն ակտիվորեն քննարկում է ԱՄՆ նախագահի հերթական սկանդալային որոշումը: Դոնալդ Թրամփը հայտարարեց կլիմայական փոփոխությունների մասին Փարիզի համաձայնագրից Միացյալ Նահանգների դուրս գալու մասին: Նա նշեց, որ երկիրը կարող է այդ ոլորտում նոր համաձայնագիր կնքելու բանակցություններ սկսել, սակայն Գերմանիան, Իտալիան եւ Ֆրանսիան արդեն հայտարարել են, որ Փարիզի համաձայնագիրը չի կարող վերանայվել: Երեք երկրների ղեկավարները նաեւ դաշնակիցներին կոչ են արել ուժեղացնել կլիմայական փոփոխությունների դեմ պայքարին ուղղված ջանքերը։
Իսկ Թրամփը պարզաբանել է, որ որոշումը կայացրել է՝ ամերիկացի ժողովրդի շահերից ելնելով: Նա կարծում է, որ Փարիզի համաձայնագիրը ոտնահարում է ԱՄՆ-ի շահերը՝ ի նպաստ այլ երկրների, եւ կարող է Ամերիկային «մինչեւ 2025 թվականը 27 մլն աշխատատեղի կորուստ արժենալ»:
Կլիմայի փոփոխությունների հարցով Փարիզի համաձայնագիրը սահմանում է գործողությունների համաշխարհային պլանը, որոնք անհրաժեշտ են՝ գլոբալ տաքացումը զսպելու միջոցով կլիմայի վտանգավոր փոփոխություններից խուսափելու համար: Համաձայնագրին միացած կողմերը պետք է քայլեր ձեռնարկեն՝ ուղղված արտանետումների նվազեցմանը, տեխնոլոգիական վերազինմանն ու կլիմայի փոփոխություններին հարմարվելուն:
Շիրակի դաշնակցական մարզպետ Հովսեփ Սիմոնյանը պաշտոնանկ է արվել: Մեր թղթակցի հետ զրույցում Աղվան Վարդանյանը հաստատել է տեղեկությունը: Սիմոնյանին այդ պաշտոնում փոխարինելու է տարածքային կառավարման եւ զարգացման փոխնախարար Արթուր Խաչատրյանը: Նշենք, որ Հովսեփ Սիմոնյանը Շիրակի մարզպետի պաշտոնը ստանձնել է 2016 թվականին, Հանրապետականի հետ Դաշնակցության կոալիցիա կազմելուց հետո:
Վարչապետը փորձում է տնտեսել պետության միջոցները, բայց դա չի արվելու սոցիալապես անապահով խավի հաշվին: Կարեն Կարապետյանը կարծում է, որ ծախսում ենք ավելի շատ, քան հնարավորություն ունենք, դրա համար առաջարկում է բարձրացնել միջոցների բաշխման հասցեականությունը: Աշխատանքի եւ սոցիալական հարցերի նախարարությունում վարչապետին նաեւ զեկուցել են. տեղեկատվական համակարգ են մշակում, դրա շնորհիվ կկարողանան ոչ թե մեկ-մեկ ստուգել բոլոր շահառուներին, այլ թիրախային ստուգումներ անցկացնել: Համակարգը կթվայնացնեն եւ մինչեւ 2019 թվականը կներդնեն: Վարչապետը տարակուսեց. բարեփոխումները կտրուկ են անում:
Երեւանում արտակարգ պատահար է տեղի ունեցել: Լամբադա կամրջի մոտ թիվ 23 համարի ավտոբուսը կողաշրջվել է: Նախնական տվյալներով՝ 8 տուժած, այդ թվում՝ երեխաներ, տարբեր մարմնական վնասվածքներով հիվանդանոց են տեղափոխվել: Դարձյալ նախնական տեղեկություններով՝ տուժածներից ոչ ոք ծանր վնասվածք չի ստացել:
Սյունիքի մարզում կորած քաղաքացու դին հայտնաբերել են Ողջի գետում: Արտակարգ իրավիճակների նախարարությունը քաղաքացու անհետանալու մասին ահազանգը ստացել էր առավոտյան: Փրկարարները 49-ամյա Կարեն Նարինյանի մարմինը գետից են դուրս բերել: Նարինյանը Քաջարանի պղնձամոլիբդանային գործարանում բանվոր էր աշխատում: Ողբերգական պատահարի մանրամասներն առայժմ հայտնի չեն:
Պայմանագրային զինծառայող Մելիք Խաչատրյանի մահվան դեպքի առիթով քրեական գործ է հարուցվել, քննչական կոմիտեի տեղեկացմամբ՝ ինքնասպանության հասցնելու հոդվածով: 36-ամյա Մելիք Խաչատրյանի դին կախված վիճակում հայտնաբերել էին զորամասի պահեստում: Դեպքի վայրում նաեւ նամակ են գտել: Մահացած ենթասպան Շիրակի մարզի Հառիճ համայնքից էր, տարիներ առաջ ընտանիքով տեղափոխվել էր Էջմիածին: Ամուսնացած էր, մանկահասակ երեխայի հայր, խաղաղապահ զորքերում էր ծառայում:
Վաղը երեւանյան հանդիսատեսին բլյուզի երեկո է սպասվում: Հանրապետության հրապարակում ելույթ կունենան Վլադիմիր Ավետիսյանն ու D’Black blues Orchestra-ն: Համերգը նվիրված է Հայաստանի առաջին Հանրապետության 99-րդ տարեդարձին: Երեւանյան բեմում կկայանա նաեւ ստեղծագործական կոլեկտիվի The Anthology of Blues նոր շոուի պրեմիերան: Խմբի անդամները տարբեր երկրներից երաժիշտներ են՝ Աֆրիկայից մինչեւ Եվրոպա: D’Black blues Orchestra խումբը բազմիցս ելույթ է ունեցել նաեւ Արցախում, հետագայում նույնպես կընդունեն ցանկացած հրավեր: Վլադիմիր Ավետիսյանն ասում է՝ իրենք որեւէ քաղաքական նպատակ չեն հետապնդում, պարզապես ելույթ են ունենում այնտեղ, որտեղ մարդիկ դրա կարիքն ունեն:
Դոլարն ու եվրոն նորից էժանանում են: Դոլարի փոխարժեքն այսօր կազմել է 482 դրամ, եվրոյինը՝ 540, ռուբլունը՝ 8 դրամ 50 լումա, ֆունտինը՝ 620 դրամ:
Հունիսի 3-ին հանրապետությունում սպասվում է առավելապես առանց տեղումների եղանակ: Ջերմաստիճանը 3-5 աստիճանով կբարձրանա: Երեւանում նույնպես տեղումներ չեն սպասվում: Մայրաքաղաքում գիշերը կդիտվի +13+15, ցերեկը՝ +26+28 աստիճան տաքություն: