Մանչեսթերի ահաբեկչությունից կարճ ժամանակ անց հարձակումներ են իրականացվել Մեծ Բրիտանիայի մայրաքաղաքում: Լոնդոնի կամրջի վրա սպիտակ միկրոավտոբուսը վրաերթի է ենթարկել անցորդներին, իսկ հետո մեծ արագությամբ շարժվել դեպի Բորո շրջանում գտնվող շուկայի տարածք: Այստեղ դանակով զինված երեք տղամարդիկ դուրս են եկել մեքենայից ու հարձակվել մարդկանց վրա:
Սքոթլենդ Յարդի տեղեկացմամբ՝ տղամարդիկ մահապարտի գոտիներով են եղել, բայց ավելի ուշ պարզվել է, որ դրանք կեղծ են եղել: Վերջին տվյալներով՝ հարձակումների հետեւանքով 7 մարդ է զոհվել, 48 տուժածներ հիվանդանոցներում են: Նրանց թվում 4 ֆրանսիացի կա, որոնցից մեկի վիճակը ծանր է, ինչպես նաեւ առնվազն 2 ավստրալացի:
Որոշ տեղեկություններով՝ հարձակվողներին գնդակահարել են: Բրիտանական մայրաքաղաքի արեւելյան Բարքինգ շրջանում, որտեղ բնակվել է ենթադրյալ ահաբեկիչներից մեկը, հատուկ գործողություն է իրականացվել: Ականատեսները պատմել են, որ բնակելի տներից մեկից գլխաշորով կանանց են դուրս բերել: Իրավապահներն իրենց հերթին հայտնել են 12 ձերբակալվածի մասին:
Հիշեցնենք, որ մայիսի 22-ին Մանչեսթերում ամերիկացի երգչուհի Արիանա Գրանդեի համերգի ժամանակ իրականացված ահաբեկչության հետեւանքով 22 մարդ է զոհվել, այդ թվում՝ երեխաներ, 78 մարդ էլ վիրավորվել է:
Ութ պետություններ՝ ընդդեմ Կատարի: Այսօր առավոտյան արաբական չորս երկրներ՝ Բահրեյնը, Սաուդյան Արաբիան, Եգիպտոսն ու ԱՄԷ-ն հայտարարեցին Կատարի հետ դիվանագիտական հարաբերությունները խզելու մասին: Ավելի ուշ նրանց միացան նաեւ Լիբիան, Եմենը, Մավրիկին եւ Մալդիվյան հանրապետությունը:
Այս երկրները Կատարի դիվանագետներին եւ քաղաքացիներին հաշված օրեր են տվել հեռանալու համար, իրենց քաղաքացիներին էլ կոչ են արել հնարավորինս արագ հեռանալ Կատարից: Սաուդյան Արաբիայի գլխավորած արաբական կոալիցիայի հրամանատարությունն իր հերթին հայտարարել է, որ դադարեցվում է Կատարի մասնակցությունը Եմենում ռազմական գործողությանը: Որպես հիմնավորում նշվում է «Դոհայի կողմից «Ալ Քաիդա»-ի եւ «Իսլամական պետության» զինված խմբավորումներին ցուցաբերվող աջակցությունը»:
Կատարի եւ հարեւանների միջեւ կոնֆլիկտը ծագել է Էր Ռիադում Պարսից ծոցի երկրների եւ ԱՄՆ-ի մասնակցությամբ գագաթնաժողովից մեկ շաբաթ անց: Կատարի պետական լրատվական գործակալությունը երկրի էմիրի անունից ուղերձ էր տեղադրել Իրանի հետ հարաբերություններ հաստատելու օգտին: Կատարի ԱԳՆ-ն հայտարարել է, որ գործակալության կայքը կոտրել են, եւ էմիրի անունից հայտարարությունը հրապարակել են հաքերները: Բայց արաբական պետություններն այս հերքումը համոզիչ չեն համարել:
Լարվածությունն օրվա ընթացքում աստիճանաբար աճեց. Կատարի բորսայի գլխավոր ինդեքսը 8 տոկոսով անկում է գրանցել, վեց ավիաընկերություններ էլ հայտարարել են դեպի Դոհա չվերթները դադարեցնելու մասին: Կատարցիները պարենի դեֆիցիտ են կանխատեսում եւ սկսել են սննդամթերք ու ջուր պաշարել: Ականատեսները պատմում են, որ խանութներն արագորեն դատարկվում են:
Սեւանա լճում երկու ձկնորսներ ջրահեղձ են եղել: Նրանց դիերը գտել են: 59-ամյա Սուրիկ Ասմարյանն ու 62-ամյա Կոլյա Սիմոնյանը Ծովագյուղի բնակիչներ էին, ազգականներ, լիճ էին գնացել խեցգետնի որսի: Ձկնորսությունը, սակայն, Ասմարյանի հիմնական զբաղմունքը չէր. նա հացի արտադրամաս ուներ, Կոլյա Սիմոնյանն էլ մատուցող էր աշխատում: Սիմոնյանի դին Փամբակ գյուղին հարակից ափից շուրջ 2 կմ հեռավորությամբ հայտնաբերել էին հունիսի 3-ին, ձկնորսական ցանցին փաթաթված, հաջորդ օրը գտել են նաեւ Ասմարյանի մարմինը:
Վանաձորում 22-ամյա երիտասարդը փորձել է ինքնասպան լինել, բայց նախ որոշել է այդ մասին հայտնել բոլորին: Նա «Ֆեյսբուք» սոցիալական ցանցի ուղիղ եթերում հայտարարել է մտադրության մասին, բայց չի հասցրել իրագործել. մտերիմները դիմել են իրավապահ մարմիններին: Որոշ տեղեկություններով՝ տղան տանը կից անասնագոմում փորձել է կախվել, բայց չի հասցրել: Իրավապահների տվյալներով՝ երիտասարդը Երեւանի բնակիչ է, մասնավոր այցով էր Վանաձոր գնացել:
Մալաթիա-Սեբաստիայում հնչած կրակոցների պատճառը պարզել են: Մայիսի 29-ի երեկոյան բնակչուհին ոստիկանություն էր զանգահարել՝ հայտնելով, որ մի անծանոթ տղամարդ հրացանով կրակում է իրենց դռանն ու պատուհանին: Իրավապահները շենքի բակում եւ բնակարանի մուտքի մոտ որսորդական հրացանի պարկուճներ էին հայտնաբերել: Հիմա պարզել են, որ բնակարանատերերի որդին նույն օրը մի աղջկա հետ փախել է: Հայտնի է, սակայն, որ աղջիկն իր կամքով է հեռացել երիտասարդի հետ, նույնիսկ գրություն է թողել տանը: Բայց զայրացած հայրը՝ 52-ամյա Սամվել Միքայելյանը, գնացել է տղայի տուն ու սկսել կրակել: Դեպքից կարճ ժամանակ անց Միքայելյանին հայտնաբերել են Մալաթիայի այգիներից մեկում: Նա ոստիկաններին է ներկայացրել կնոջ անվամբ հաշվառված որսորդական հրացանը:
Ֆուտբոլի Հայաստանի հավաքականը Երեւանում անցկացված ընկերական խաղում 5։0 հաշվով հաղթեց Սենթ Քիթսի եւ Նեւիսի թիմին: Հիմա Արթուր Պետրոսյանի գլխավորած թիմը պատրաստվում է հունիսի 10-ին Պոդգորիցայում անցկացվելիք Չեռնոգորիայի դեմ աշխարհի առաջնութան ընտրական խաղին: 5:0 հաշվով հաղթանակն ամենախոշորն է ազգային հավաքականի տնային հանդիպումներում: Արթուր Պետրոսյանը դարձավ Հայաստանի հավաքականի պատմության առաջին գլխավոր մարզիչը, որն ազգային թիմում մեկնարկում է 3 անընդմեջ հաղթանակով: Հայաստանի հավաքականի լավագույն ռմբարկու Հենրիխ Մխիթարյանը խաղում երկու գոլ խփեց եւ բարելավեց իր ռեկորդն ազգային թիմում՝ 22 գոլ: Հավաքականի կազմում իրենց առաջին գոլերը խփեցին Ռուսլան Կորյանն ու Արտակ Եդիգարյանը, իսկ նորամուտը նշեցին Նարեկ Ասլանյանն ու Արմեն Մանուչարյանը:
Մադրիդի «Ռեալ»-ն էլ Չեմպիոնների լիգայի եզրափակիչում 4:1 հաշվով հաղթեց Թուրինի «Յուվենտուս»-ին եւ 12-րդ անգամ նվաճեց եվրոպական չեմպիոնների գավաթը: Արքայական թիմը դարձավ Չեմպիոնների լիգայի դարաշրջանում տիտղոսը պաշտպանած առաջին ակումբը: Զինեդին Զիդանն էլ նման հաջողության հասած առաջին մարզիչն է: Մադրիդում երկրպագուները ցնծությամբ են դիմավորել «Ռեալ»-ին:
Դոլարը, եվրոն ու ռուբլին ամրապնդում են դիրքերը: Դոլարի փոխարժեքն այսօր կազմել է 482 դրամ, եվրոյինը՝ 543, ռուբլունը՝ 8 դրամ 52 լումա, ֆունտինը՝ 622 դրամ:
Հունիսի 6-ին հանրապետության հյուսիսային շրջաններում երեկոյան ժամերին սպասվում է կարճատեւ անձրեւ եւ ամպրոպ: Ջերմաստիճանը 2-3 աստիճանով կբարձրանա: Երեւանում նույնպես առանձին հատվածներում տեղումներ են սպասվում: Մայրաքաղաքում գիշերը կդիտվի +17+19, ցերեկը՝ +31+33 աստիճան տաքություն: