Երեւանում հունիսի 7–ին ցուցադրվելու է հայերի կոտորածների մասին պատմող թուրքական «Վանքի երեխաները» ֆիլմը։ Այս մասին լրագրողների հետ հանդիպմանն ասաց Հայաստանում ում «Արեւմտահայոց ազգային համագումար»-ի լիազոր ներկայացուցիչ եւ «Վերադարձ» հիմնադրամի նախագահ Արագած Ախոյանը:
Իր խոսքում Արագած Ախոյանը նշեց, որ «Արեւմտահայոց ազգային համագումար» միջազգային ոչ կառավարական կազմակերպության մշակույթի հանձնաժողովը նախաձեռնել է Հայոց ցեղասպանության եւ դրա հետեւանքների մասին թուրք հեղինակների՝ պրոդյուսեր Քազըմ Գյունդողանի եւ ռեժիսոր Նեզահաթ Գյունդողանի նկարահանած ֆիլմի երեւանյան ցուցադրությունը, որը կկայանա«Մոսկվա» կինոթատրոնում։
«Բազմիցս, տարիներ շարունակ «Վերադարձ» հիմնադրամը տարբեր մշակութային ծրագրեր է իրականացրել եւ այսօր այս առումով ունենք երկու միջոցառում: Մեկը լինելու է վաղը՝ Մոսկվա կինոթատրոնում ժամը 18:00 կցուցադրվի “Վանքի երեխաները” ֆիլմը»,-ասաց Ախոյանը՝ շեշտելով, որ 1ժամ տեւողությամբ ֆիլմը պատմում է ցեղասպանության ժամանակ տարբեր ճանապարհներով փրկված եւ քրդերի ու թուրքերի մեջ մեծացած հայ երեխաների մասին:
Իր հերթին ֆիլմի պրոդյուսեր Քազըմ Գյունդողանը նշեց, որ Թուրքիայում մինչ օրս էլ շարունակվում է ժխտողական քաղաքականությունը կապված այդ երկրում 20-րդ դարում տեղի ունեցած բազմաթիվ ցեղասպանությունների հետ, որոնց զոհ են դարձել այդ երկրում ապրող բազմաթիվ ազգերի ներկայացուցիչները, այդ թվում նաեւ հայերը:
