Երեւանում այսօր` հունիսի 6-ին, մոլեգնած ուժեղ քամու հետեւանքով տանիքներ են պոկվել եւ ընկել Մյասնիկյան պողոտայի բանուկ հատվածում:
NEWS.am-ի թղթակիցը հաղորդում է, որ շուրջ 40 րոպե պողոտան երկկողմանի փակվել էր, մինչեւ այս պահը բանուկ հատվածում դեռեւս հարակից շինությունների տանիքներից կտորներ կան ընկած, ինչն էլ խցանման պատճառ է դարձել:
Քիչ առաջ բացվել է Մյասնիկյան պողոտայի իջնող հատվածը, իսկ հակառակ ուղղությամբ դեռ խցանումներ կան:
Քամին ավերածություններ է արել նաեւ Իսակովի պողոտայում, որտեղ լուսացույց է պոկել եւ նետել գետնին։ Ծառեր են տապալվել նաեւ ԵՊՀ շրջակայքում։
Երեւանի քաղաքապետարանից էլ NEWS.am-ին հայտնեցին, որ այսօր արձանագրված ուժեղ քամին մայրաքաղաքում տարատեսակ վնասներ է պատճառել և ստեղծել է որոշակի անհարմարություններ: Երևանի քաղաքապետ Տարոն Մարգարյանի հանձնարարությամբ աշխատակազմի համապատասխան ծառայություններն արդեն իսկ ձեռնամուխ են եղել քամու հետևանքով պատճառված վնասները շուտափույթ վերացնելու աշխատանքներին: