Վարչապետ Կարեն Կարապետյանը հրաժարական տալու որեւէ պատճառ չունի: Տավուշի մարզ կատարած այցի ժամանակ այս մասին ասել է նախագահ Սերժ Սարգսյանը: Անդրադառնալով լրագրողների դիտարկմանը, թե վերջին շրջանում մամուլն անընդհատ գրում է իր ու վարչապետի միջեւ լարվածության, ինչպես նաեւ Կարեն Կարապետյանի հրաժարականի մասին, Սերժ Սարգսյանը վստահեցրել է, որ հակասությունների, հակամարտության մասին լուրերը մտացածին են, իսկ երկրում եւ Հանրապետական կուսակցությունում առողջ աշխատանքային մթնոլորտ է տիրում: Նշենք, որ մամուլում լուրեր են տարածվել, որ Կարեն Կարապետյանն արդեն երկու անգամ հրաժարական է ներկայացրել Սերժ Սարգսյանին, բայց մերժում է ստացել: Բացի այդ, նշվում է, թե Հանրապետական կուսակցությունում արդեն որոշել են. 2018 թվականի ապրիլից հետո վարչապետի պաշտոնը Սերժ Սարգսյանն է զբաղեցնելու:
Հանրապետության տարածքում այսօր ուժեղ քամի է մոլեգնել: Արտակարգ իրավիճակների նախարարությունում ահազանգեր են ստացել Երեւանից ու Էջմիածնից: Տանիքներ են վնասվել, ջերմոցներ, ծառեր են շրջվել, ուժեղ քամին նաեւ էլեկտրահաղորդման գծեր է վնասել: ՀԷՑ-ի տեղեկացմամբ՝ «Հայրենիք» ենթակայանի վնասվելու հետեւանքով Շենգավիթ համայնքի մի մասը որոշ ժամանակ հոսանքազրկված է եղել: Քամու հետեւանքով տանիքներից պոկված թիթեղներն էլ հայտնվել են Մյասնիկյան պողոտայի բանուկ հատվածում: Պողոտան շուրջ 40 րոպե երկկողմանի փակվել է: Իսակովի պողոտայում էլ ուժեղ քամու հետեւանքով շրջվել է լուսակրի սյունը:
Ֆիրդուսի փողոցում արդեն 20 տարուց ավելի գործող շուկայի տարածքը մեկ շաբաթվա ընթացքում պետք է ազատվի: Առեւտրականներն ասում են՝ այդ մասին երեկ լրատվամիջոցներից են տեղեկացել: Քաղաքապետարանը երկու տարբերակ է առաջարկում. «Երեւան» կամ «Առինջ մոլ» տոնավաճառներ: Երկուսն էլ, սակայն, ֆիրդուսցիների սրտով չեն: Տեսախցիկի առջեւ նրանք չեն ցանկացել խոսել, բայց կադրից դուրս պատճառաբանել են, որ Ֆիրդուսի շուկայում առեւտուր են անում ավելի քան 15 տարի, իրենց հաճախորդներն ունեն: Ոմանք այլ տոնավաճառներում փորձել են աշխատել, բայց հասկացել են, որ իրենց ապրանքը նման տոնավաճառների համար չէ: Հիմա քաղաքային իշխանություններին խնդրում են մինչեւ աշուն իրենց ժամանակ տալ, որ կարողանան մնացած ապրանքը վաճառել, վճարել պարտքերն ու վարկերը:
Լոռու մարզի Արջահովիտ գյուղի տներից մեկում այսօր խոշոր հրդեհ է բռնկվել: Բարեբախտաբար, տուժածներ չկան, բայց տունը մոխրակույտի է վերածվել: Գյուղապետը պատմել է, որ կրակը շատ արագ տարածվել է՝ հասնելով նաեւ կողքի փայտաշեն տնակներին: Հիմա ընտանիքի 8 անդամները, որոնք փայտե տնակը ստացել էին երկրաշարժից հետո, առանց ծածկի են մնացել: Տանը կից փակ կառույց կա, առայժմ ստիպված են այնտեղ բնակվել, մինչեւ լուծվի տան խնդիրը: Հրդեհի պատճառը դեռեւս հայտնի չի: Ենթադրում են, որ հոսանքալարերի հետ կապված խնդիր է եղել:
Սյունիքի մարզում մահվան ելքով վթար է տեղի ունեցել: Սառնակունք գյուղի մոտակայքում 34-ամյա Գրիգոր Թեւոսյանը քարշակավոր բեռնատարով բախվել է «Cհrysler» մակնիշի մեքենային: Վերջինի վարորդը՝ 32-ամյա Արտյոմ Խաչատրյանը, տեղում մահացել է: Նա Վայոց ձորի մարզի Աղավնաձոր գյուղից էր: Քրեական գործ է հարուցվել:
Շուրջ 5 հազար դիմորդներ այսօր մասնակցել են «Հայոց լեզու եւ գրականություն» առարկայի միասնական քննությանը: Քննական կենտրոններից մեկում եղել է նաեւ կրթության նախարարը: Նախորդ տարվա համեմատ՝ դիմորդների թիվը 1500-ով նվազել է: Այս տարի բուհ ընդունվելու համար դիմել է 9 հազար 737 շրջանավարտ: Պետպատվերի շրջանակում բուհ կկարողանա ընդունվել 1641 դիմորդ, 18 հազար տեղ էլ հատկացվել է վճարովի համակարգի համար: 2018 թվականին դիմորդների թիվն ավելի քիչ է լինելու: Լեւոն Մկրտչյանն ասում է՝ պետք է ամեն ինչ անեն, որպեսզի բուհերն ուսման վարձը չբարձրացնեն:
Նախարարությունը նաեւ մտադիր է միասնական քննությունների համակարգում փոփոխություններ կատարել: Նախ՝ ուզում են դիմորդներին հնարավորություն տալ տարվա ընթացքում երկու անգամ քննություն հանձնել: Այս դեպքում հարկ կլինի էլեկտրոնային համակարգ ներդնել: Սա ֆինանսավորում է պահանջում, բայց ոչ շատ: Ցանկանում են պահպանել նաեւ առաջին հայտի գերակայության սկզբունքը, ինչպես նաեւ առանձնացնել վճարովի եւ անվճարի տեղերի մրցույթը: Այս ամենը հույս ունեն մինչեւ հոկտեմբեր ներդնել, որպեսզի արդեն հաջորդ տարի նոր կարգով կազմակերպեն միասնական քննությունները:
Դոլարը շարունակում է թանկանալ, իսկ եվրոն էժանացել է: Արդյունքում դոլարի փոխարժեքն այսօր կազմել է 482 դրամ, եվրոյինը՝ 542, ռուբլունը՝ 8 դրամ 50 լումա, ֆունտինը՝ 623 դրամ:
Հունիսի 7-ին հանրապետության հյուսիսային շրջաններում երեկոյան ժամերին սպասվում է կարճատեւ անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանն էապես չի փոխվի: Երեւանում նույնպես առանձին հատվածներում տեղումներ են սպասվում: Մայրաքաղաքում գիշերը կդիտվի +18+20, ցերեկը՝ +33+35 աստիճան տաքություն: