Չինաստանը մտադիր է առաջիկա հինգ տարիների ընթացքում 4 կառավարվող տիեզերական առաքելություններ իրականացնել։ Առաքելություններն իրականացվելու են տիեզերակայանի շինարարության նախագծի շրջանակում։ Այս մասին հայտնել է Չինաստանի կառավարվող տիեզերական թռիչքների ծրագրի գրասենյակի ղեկավաի տեղակալ, Չինաստանի առաջին տիեզերագնաց Յան Լիվեյը, փոխանցում է «Սինհուան»։

Նրա խոսքով, երկու առաքելությունները կկայանան 2020-ին։ Չինաստանը մտադիր է տիեզերակայանի շինարարությունն ավարտել 2022-ին, մինչ այդ իրականացնելով ընդհանուր առմամբ մոտ 12 առաքելություն՝ տիեզերական սարքերի արձակումով, նկատել է Յան Լիվեյը։ Չինաստանի տիեզերակայանի առաջին առանցքային մոդուլը արձակվելու է 2019-ին, հետագայում նույնպես ծրագրվում է երկու փորձնական մոդուլների արձակումներ։ Կայանը տիեզերագնացներին  թույլ կտա տիեզերքում մնալ 3-6 ամիս։

Լիվեյը հայտնել է, որ հիմա տիեզերագնացներին են նախապատրաստում կայանի համար։ Չինաստանը նաեւ ծրագրում է այս տարվա ընթացքում համալրել տիեզերագնացների թիմը։