Ահաբեկչությունների ալիքը հասավ Իրան: Թեհրանում այսօր մի քանի հարձակում է իրականացվել, որոնց հետեւանքով 12 մարդ է զոհվել, 42 վիրավոր կա: Չորս զինված անձ նախ երկրի խորհրդարան է ներխուժել: Նրանք կանացի հագուստով են եղել: Ահաբեկիչներից մեկը խորհրդարանի շենքում պայթեցրել է իրեն, մյուս երեքին ոչնչացրել են Իսլամական հեղափոխության պահապանների կորպուսի զինվորականները: Պաշտոնական տվյալներով՝ երկու զինյալներ էլ հարձակում են գործել Այաթոլլա Խոմեյնիի դամբարանի տարածքում: Ահաբեկիչներից մեկը՝ կին, փոխհրաձգության ընթացքում պայթեցրել է մահապարտի գոտին, երկրորդը փորձել է փախուստի դիմել, բայց իրավապահները կարողացել են չեզոքացնել նրան:
Հատուկ գործողության ընթացքում բոլոր ահաբեկիչները ոչնչացվել են, իրավապահները նաեւ ծրագրված եւս մեկ հարձակում են կանխել, ահաբեկիչներին՝ ձերբակալել: Ահաբեկչությունների պատասխանատվությունը ստանձնել է «Իսլամական պետություն» խմբավորումը:
Իրանի խորհրդարանի պատգամավորներն ահաբեկչության հետեւանքով չեն տուժել: Հայ պատգամավոր Կարեն Խանլարյանը տեղեկացրեց, որ հարձակման ժամանակ խորհրդարանականները նիստերի դահլիճում են եղել, իսկ հարձակումն իրականացվել է վարչական շենքում, որտեղ պատգամավորների աշխատասենյակներն են: Նիստերի դահլիճում նույնիսկ պայթյունների ու կրակոցների ձայներ չեն լսվել:
Փորձագետներն իրենց հերթին փորձում են բացատրել ահաբեկչությունների պատճառը: Թեհրանի «Արաքս» պարբերականի խմբագիր Մովսես Քեշիշյանն ասում է՝ հարձակումներն ինչ-որ առումով սպասելի էին, սպառնալիքներ վաղուց էին հնչում: Այդ կերպ փորձում են ճնշել Իրանին ահաբեկիչներին հակազդելու համար: Քեշիշյանը նշեց, որ, որոշ տեղեկություններով, հարձակվողները Մարոկկոյից էին:
Քաղաքագետ Կարինե Գեւորգյանն էլ կապ է տեսնում Կատարի եւ Իրանի իրադարձությունների միջեւ: Նա կարծում է, որ տարածաշրջանում պատերազմ է հասունանում, որն անխուսափելիորեն կառնչվի նաեւ Անդրկովկասին: Քաղաքագետը հիշեցնում է Իրանում բնակվող հարյուր հազարավոր հայերի մասին, իրադարձությունների զարգացման դեպքում կարող է Հայաստան փախստականների մեծ հոսք սկսվել:
Ազգային ժողովում այսօր մեկ րոպե լռությամբ հարգել են Թեհրանում իրականացված ահաբեկչությունների զոհերի հիշատակը: Իսկ պատգամավորները խորհրդարան էին եկել կառավարության նախաձեռնած արտահերթ նիստին մասնակցելու: Քննարկումների հենց սկզբում վիճաբանություն ծագեց: Արա Բաբլոյանը հայտարարեց մի շարք օրենքների քննարկման եւ քվեարկության համար սահմանված ժամանակի մասին, Նիկոլ Փաշինյանն ու Նաիրա Զոհրաբյանն ընդդիմացան. օրենքները կարեւոր են, ժամանակը՝ շատ քիչ:
Ի վերջո՝ ՀՀԿ-ն զիջեց ընդդիմությանը. պետական գույքի մասնավորեցման եռամյա ծրագրի եւ Հայաստանի վարչատարածքային բաժանման մասին օրինագծերի համար 3.5 ժամ սահմանվեց: Ի դեպ՝ պետգույքի մասնավորեցման մասին: Նաիրա Զոհրաբյանը հանրային քննարկումներ, հստակ ծրագրի ներկայացում է պահանջում:
Պատգամավորներն այսօր քննարկեցին նաեւ «Կոռուպցիայի կանխարգելման հանձնաժողովի մասին» օրենքի նախագիծը: Նիկոլ Փաշինյանը կարծում է, որ հանձնաժողովի ղեկավարին պետք է ընդդիմությունն առաջադրի, իսկ հանձնաժողովում պետք է ընդգրկվեն կոռուպցիայի դեմ պայքարի քաղաքական կամք ունեցող մարդիկ:
«Ազդարարման համակարգի» մասին օրինագիծն էլ նորաթուխ պատգամավոր Անդրանիկ Կարապետյանին բոցաշունչ հայրենասիրական ելույթի մղեց: Դաշնակցական պատգամավորը համոզված է, որ այս օրենքը «հարիր չէ հայ տեսակին», այն ժողովրդին «գործ տվող» է դարձնում: «Ելք»-ից պատգամավոր Մանե Թանդիլյանը տարակուսեց. իսկ ո՞րն է հայեցի, ջայլամությո՞ւն անել, երբ տեսնում ես՝ կոռուպցիա կա, բայց չես խոսում: Փաշինյանն էլ «Կոշի գաղութը» հիշեց:
Խորհրդարանի միջանցքում Սեյրան Սարոյանին հարցրել են պաշտպանության նախկին նախարարի հայտարարության մասին: Սեյրան Օհանյանը հայտարարել էր, թե պայքարելու է իշխանափոխության համար, եւ խորհրդարանից դուրս զարգացումները կարող են բերել ֆորս մաժորի: Լրագրողները հետաքրքրվել են. եթե նախկին մարտական ընկեր Օհանյանն իրեն օգնության խնդրանքով դիմի, կաջակցի՞ իշխանափոխության հարցում: Իշխանափոխության մասին պարբերաբար հայտարարում է նաեւ Զարուհի Փոստանջյանը: Սրան Սեյրան Սարոյանը հեգնանքով է պատասխանել:
Երեւանի հիվանդանոցներից մեկում առավոտյան լույս աշխարհ է եկել մեկ տարի առաջ Արցախում զոհված զինծառայող Արտյոմ Վարդերեսյանի եղբայրը: Ծնողները որոշել են փոքրիկին զոհված որդու անունով Արտյոմ կոչել: Մայրը պատմում է, թե ինչպես են որոշում կայացրել անվան ընտրության հարցում: Արտյոմ Վարդերեսյանը զոհվել է 2016 թվականի մարտի 17-ին, հակառակորդի արձակած կրակոցից: Նա ընտանիքի միակ արու զավակն էր, իրենց փոքր երկու քույր ուներ:
Երեկ Երեւանում մոլեգնած փոթորկի հետեւանքով ողբերգական դեպք է տեղի ունեցել: Տանիքից պոկված մետաղյա թիթեղներն ընկել են 63-ամյա քաղաքացու վրա: Մարմնական վնասվածքներ ստացած Բաղդասար Չարկիչյանը հիվանդանոց տեղափոխվելու ճանապարհին մահացել է:
Մայրաքաղաքում եւ Արմավիրի մարզում, մասնավորապես՝ Էջմիածին քաղաքում եւ հարակից գյուղերում ուժեղ քամին բազմաթիվ վնասներ է հասցրել. տանիքների թիթեղներ են պոկվել, ալեհավաքներ, ծառեր, ջերմոցներ են վնասվել, սյուներ են շրջվել: Այս ամենի հետեւանքով հատկապես Երեւանում ճանապարհները որոշ ժամանակ դժվարանցանելի կամ փակ են եղել: Ուժեղ քամու հասցրած վնասների չափը դեռեւս հայտնի չէ:
Լոռու մարզում այսօր խոշոր վթար է տեղի ունեցել: Սպիտակ-Վանաձոր ավտոճանապարհին բախվել են Opel եւ «ՎԱԶ 2106» մակնիշների մեքենաները: Վթարի հետեւանքով «ՎԱԶ 2106»-ի վարորդը՝ 53-ամյա Պարգեւ Դունամալյանը, ոտքի վնասվածքով հիվանդանոց է տեղափոխվել: 23-ամյա Լիլիթ Ազարյանի Opel-ում էլ հրդեհ է բռնկվել:
Դոլարի վերելքին այսօր նաեւ եվրոն է միացել: Դոլարի փոխարժեքն այսօր կազմել է 482 դրամ, եվրոյինը՝ 543, ռուբլունը՝ 8 դրամ 52 լումա, ֆունտինը՝ 623 դրամ:
Հունիսի 8-ին հանրապետության հյուսիսային շրջաններում սպասվում է կարճատեւ անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանն էապես չի փոխվի: Երեւանում վաղը սպասվում է ամպրոպ, առանձին հատվածներում՝ կարճատեւ տեղումներ: Մայրաքաղաքում գիշերը կդիտվի +16+18, ցերեկը՝ +31+33 աստիճան տաքություն:
Արտակարգ իրավիճակների նախարարությունը նաեւ զգուշացնում է, որ ուլտրամանուշակագույն ճառագայթման ինդեքսը հունիսի 8-ին կհասնի 6-ի: Խորհուրդ է տրվում ժամը 13:00-ից 17:00-ն ընկած ժամանակահատվածում խուսափել արեգակի ուղիղ ճառագայթներից: