«Սասնա ծռեր» խմբի անդամների գործով առաջին նիստին եկած հարազատներին թույլ չեն տալիս մտնել դատարանի շենք։

NEWS.am-ի թղթակիցը հաղորդում է, որ կարգադրիչները եւ ոստիկանները պատճառաբանում են, որ դատական նիստերի դահլիճը փոքր է եւ այդ պատճառով չեն կարող հարազատներին թույլ տալ մտնել շենք։ Այս պահին դատարանի դիմաց իրավիճակը լարված է։

«Սասնա ծռերի» անդամների հարազատները պահանջում են, որ իրենց ներս թողնեն։ Նրանք հրում են դատարանի դիմաց դրված երկաթյա պատնեշները եւ փորձում մտնել դատարանի շենք։ Երեւանի փոխոստիկանապետ Վալերի Օսիպյանն ամբաստանյալների հարազատների հետ զրույցում նշեց, որ դատարանի շենք ներս թողնելու համար իրենք պատասխանատու չեն, ոստիկանները այստեղ միայն կարգն են պահպանում։

Նշենք որ հրմշտոցի մեջ նաեւ վատացավ «Սասնա ծռերի» աջակիցներից մի կնոջ ինքնազգացողություն։ Դատարանի շենքի դիմաց նրա համար շտապօգնության մեքենա են կանչել։