Այսօր պետք է մեկնարկեր «Սասնա ծռեր» խմբի գործով առանձնացված մասի դատավարությունը: Դատարան բերված ամբաստանյալներին ներկաները ծափերով են դիմավորել, Պավլիկ Մանուկյանն էլ սկսել է երգել:
Նիստը, սակայն, դեռ չսկսված՝ դատավոր Արտուշ Գաբրիելյանը հայտարարել է այն հետաձգելու մասին ու արագորեն հեռացել դահլիճից: Պատճառն այն է, որ ամբաստանյալների հարազատներն աղմկել են՝ անտեսելով լռություն պահպանելու՝ դատավորի հորդորը:
Արդյունքում դատարանում նաեւ քաշքշուկ է սկսվել դատական կարգադրիչների եւ ամբաստանյալներից մի քանիսի միջեւ, բայց գործը ծեծկռտուքի չի հասել. Պավլիկ Մանուկյանը սաստել է ընկերներին, ինչից հետո ամբաստանյալներին դուրս են բերել դատարանի դահլիճից: Մինչ հեռանալը Պավլիկ Մանուկյանը հասցրել է մի քանի բառ փոխանակել լրագրողների հետ: Նա հայտարարել է, որ իրեն առաջադրված մեղադրանքը չի ընդունում: Նաեւ հավելել է, որ մարտական է տրամադրված. իրեն չի ընկճում նույնիսկ առողջական վիճակը: Հավելենք, որ վաղ առավոտից Էրեբունի եւ Նուբարաշեն վարչական շրջանների ընդհանուր իրավասության դատարանում, որտեղ պետք է քննվի գործը, ուժեղացված հսկողություն էր իրականացվում՝ Երեւանի փոխոստիկապետ, այս գործով տուժող Վալերի Օսիպյանի գլխավորությամբ:
Իսկ մինչ այդ «Սասնա ծռեր» խմբի անդամների հարազատներն ու աջակիցներն այսօր Երեւանում երթ են անցկացրել: Ազատության հրապարակից նրանք քայլել են մինչեւ դատարան: Հարազատների մի մասն այդպես էլ չի կարողացել դատարան մտնել: Ոստիկանները պատճառաբանել են, որ դահլիճում տեղ չկա: Սա զայրացրել է «Սասնա ծռեր»-ի անդամների հարազատներին ու հրմշտոց է սկսվել նրանց ու իրավապահների միջեւ:
Հիշեցնենք, որ 2016 թվականի հուլիսի 17-ին «Սասնա ծռեր» զինված խումբը գրավել էր Երեւանի ՊՊԾ գունդը եւ միայն երկու շաբաթ անց հանձնվել ոստիկանններին: Երկու շաբաթվա ընթացքում երեք ոստիկան է զոհվել, «Սասնա ծռեր»-ի մի քանի անդամներ էլ վիրավորվել են:
Ազգային ժողովում շարունակվել է կառավարության նախաձեռնած արտահերթ նիստը: Այսօր էլ նիստի սկզբում խնդիր է առաջացել գրանցման ժամանակ: Որոշ պատգամավորներ փորձել են ուրիշի փոխարեն գրանցվել: Սա, ինչպես միշտ, չի վրիպել Նիկոլ Փաշինյանի ուշադրությունից: Արձանագրել է. բացակա պատգամավորների փոխարեն գրանցման կոճակ սեղմողներ են եղել: Խորհրդարանի խոսնակը ստիպված է եղել երեք անգամ գրանցում հայտարարել:
Բուռն քննարկումների ու ելույթների առիթ է դարձել «Պետական գույքի մասնավորեցման 2017-2020 թվականների ծրագրի մասին» օրինագիծը: Միքայել Մելքումյանը կարծում է, որ առողջապահական ու կրթական հիմնարկները պետք է հանել սեփականաշնորհման ցանկից: Նա նաեւ զարմացած է ոլորտների պատասխանատու նախարարների անտարբերությունից ու անտեղյակությունից:
Նիկոլ Փաշինյանի համար անընդունելի է, որ հանրության լայն շերտերի շահերը շոշափող առողջապահական օբյետկտների սեփականաշնորհումը տեղի է ունենում առանց հանրային պատշաճ լսումների: Պատգամավորը խոսել է նաեւ պետպատվերի համակարգի, սրտի անվճար ստենտավորման համար կառավարության սահմանած պայմանների մասին՝ հեգնելով. հիվանդներին տուն են ուղարկում, մինչեւ ինֆարկտը նորմալ խփի, նոր ստենտավորեն:
Այսօր քննարկվել է նաեւ «ՀՀ վարչատարածքային բաժանման մասին» օրենքում փոփոխությունների նախագիծը: Փաշինյանը կարծում է, որ համայնքների խոշորացման գաղափարը լավն է, բայց պետք է հասկանալ, արդյո՞ք այն արդյունավետ կլինի: Ասում է՝ Հայաստանում ամեն գյուղի բնակիչ համոզված է, որ ինքն առանձնահատուկ է: Այս, նրա գնահատմամբ, տեղային հայրենասիրությունը վտանգավոր է:
Երեկ մեծ արձագանք էր ստացել «Ազդարարի մասին» օրենքի քննարկման ժամանակ դաշնակցական պատգամավոր Անդրանիկ Կարապետյանի՝ «գործ տվող» ձեւակերպումը: Դաշնակցություն խմբակցության ղեկավարն այսօր արդարացրել է գործընկերոջը. պարզապես մտքերը ճիշտ չի ձեւակերպել: Ինքը՝ Արմեն Ռուստամյանը, կողմ է ազդարարի ինստիտուտին:
Կառավարության այսօրվա նիստում վարչապետի առաջին իսկ հանձնարարականը վերաբերել է տրանսպորտին, ավելի կոնկրետ՝ տաքսի ծառայություն մատուցողներին: Կարեն Կարապետյանի խոսքով՝ «Զվարթնոց» օդանավակայանում չպետք է ոչ բարեկիրթ տրանսպորտ լինի: Խնդրով հանձնարարել է զբաղվել տրանսպորտի նախարարին եւ ոստիկանապետին: Վլադիմիր Գասպարյանն արդարացել է. տաքսի ծառայություն մատուցելու լիցենզիա ստանում է գործնականում յուրաքանչյուրը՝ նախկին դատապարտյալներ, նարկոդիսպանսերում հաշվառվածներ եւ այլն։ Ստուգում են, զրկում լիցենզիայից, կարճ ժամանակ անց նույն անձը նորից լիցենցիա է ստանում:
Կարապետյանն այսօր հանձնարարել է նաեւ պարզեցնել սեզոնային մրգերի արտահանման վարչարարությունը, լրացուցիչ արտոնություններ տրամադրել թեթեւ արդյունաբերությամբ զբաղվողներին: Վարչապետն ուզում է կարի ֆաբրիկաներին օգնել, որպեսզի կարողանան շրջաններում արտադրամասեր բացել:
Օրերս 9 պետություններ հայտարարեցին Կատարի հետ դիվանագիտական կապերը խզելու մասին, Հայաստանն էլ առանց վիզայի ռեժիմ է սահմանել այդ երկրի քաղաքացիների համար: Շավարշ Քոչարյանը հորդորում է կառավարության որոշումը չքաղաքականացնել, այն կապված է ընդամենը տուրիզմի զարգացման հետ. Կատարը տուրիզմի հեռանկարային շուկա է մեզ համար:
Այսօր հանկարծամահ է եղել անվանի ջազ երաժիշտ Արմեն Թութունջյանը՝ Չիկոն։ Նախնական տվյալներով՝ երաժիշտը մահացել է սրտի կաթվածից: Արմեն Թութունջյանը Հայաստանի արվեստի վաստակավոր գործիչ էր, Երեւանի պետական կոնսերվատորիայի դոցենտ: Մասնակցել է տարբեր մրցանակաբաշխությունների ու պարգեւների արժանացել: 1992 թվականին նա մի խումբ երիտասարդ երաժիշտների հետ ստեղծել է «Չիկոն եւ ընկերները» խումբը, որտեղ նվագել են հանրապետության մի շարք հայտնի ջազային երաժիշտներ: 2011 թվականին լույս է տեսել Արմեն Թութունջյանի «Ռիթմ եւ շարժում» ուսումնական ձեռնարկը:
Հանրապետությունում այսօր մի քանի պատահար է գրանցվել: Լոռու մարզում մահվան ելքով վթար է տեղի ունեցել: Ստեփանավան-Ալավերդի ճանապարհին՝ Կողես գյուղի մոտ, ռուսական համարանիշերով ԳԱԶ-2410 մակնիշի մեքենան բախվել է ճամփեզրի կամրջակին: Վթարի հետեւանքով ուղեւորներից երկուսը մահացել են՝ Գյումրիի բնակիչ, 61-ամյա Ռուզաննա Հովհաննիսյանը եւ 47-ամյա Ռիտա Մանուկյանը: Վարորդը՝ 57-ամյա Խաչիկ Սուքիասյանը եւ անչափահաս երկու ուղեւորները տեղափոխվել են Ստեփանավանի բուժկենտրոն: Վիրավորները փրկարարներին պատմել են, որ Վլադիկավկազից գալիս:
Կոտայքի մարզում մահվան ելքով վրաերթ է տեղի ունեցել: Nissan մակնիշի մեքենայի վարորդը հանել է համարանիշերն ու դեպքի վայրից փախուստի դիմել: Վրաերթի ենթարկվածը՝ Հրազդանի 58-ամյա բնակիչ Վալերի Թորոսյանը, ծայրահեղ ծանր վիճակում հիվանդանոց է տեղափոխվել, որտեղ էլ մահացել է: Ականատեսները պատմել են, որ մեքենան հաշվառված է Հրազդանի քաղաքապետարանի հաշվեկշռում եւ սպասարկում է քաղաքապետ Արամ Դանիելյանին, իսկ ավտոմեքենան վարել է նրա անչափահաս որդին՝ 17-ամյա Ռազմիկ Դանիելյանը:
Ռուսական լրատվամիջոցներն այսօր տեղեկություն տարածեցին, որ Ռիոյի Օլիմպիական խաղերի փոխչեմպիոն, հունահռոմեական ոճի ըմբշամարտի Հայաստանի հավաքականի առաջատարներից Միհրան Հարությունյանը Մոսկվայում վիճաբանության է մասնակցել: Աղբյուրների փոխանցմամբ՝ ավտոտեխսպասարկման կետում Հարությունյանը վիճել է ընկերոջ՝ 34-ամյա Սամվել Ավետյանի հետ ու իր մոտ եղած գրանցված ատրճանակից կրակել նրա ուղղությամբ:
Նրա անձնական մարզիչ Սամվել Գեւորգյանը, սակայն, մեր թղթակցին ասել է, որ Միհրանը դեպքի վայրում եղել է, բայց վիճաբանության հետ կապ չի ունեցել: Նրա անունը շրջանառվում է, քանի որ ավտոսպասարկման կետի մոտ կայանված է եղել նրա մեքենան: Մարզչի հավաստմամբ՝ Հարությունյանը հիմա հիվանդանոցում է, պատրաստվում է վաղը նշանակված ձեռքի վիրահատությանը:
Դոլարի փոխարժեքն այսօր գրեթե չի փոխվել, իսկ եվրոն ու ռուբլին էժանացել են: Արդյունքում հունիսի 8-ին դոլարի փոխարժեքը կազմել է 482 դրամ, եվրոյինը՝ 541, ռուբլունը՝ 8 դրամ 47 լումա, ֆունտինը՝ 623 դրամ:
Հունիսի 9-ին հանրապետության հյուսիսային շրջաններում սպասվում է կարճատեւ անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանն էապես չի փոխվի: Երեւանում վաղը առանձին հատվածներում՝ հնարավոր են կարճատեւ տեղումներ եւ ամպրոպ: Մայրաքաղաքում գիշերը կդիտվի +17+19, ցերեկը՝ +32+34 աստիճան տաքություն: