Երեւանի նորընտիր ավագանու առաջին նիստն ուղեկցվել է սկանդալով: «Երկիր Ծիրանի» խմբակցությունը ցուցադրաբար բոյկոտել է նիստը, դրսում կազմակերպել ավագանու այլընտրանքային նիստ եւ ցույց տալու համար, որ ՀՀԿ-ին չարիք է համարում, դիմել է չարը խափանելու ժողովրդական մեթոդներին: Մինչ Զարուհի Փոստանջյանն իր աշխատասենյակն էր փնտրում, ավագանին իր առաջին նիստում որոշեց Տարոն Մարգարյանի երդմնակալության օրը՝ հունիսի 12-ին: «Ելք»-ն ավագանու նիստին մասնակցել է առանց ինտրիգների:
Սկանդալ է տեղի ունեցել Երեւանի Օպերայի թատրոնում: «Գայանե» բալետի ներկայացումը տապալվել է, նվագախմբի 80-ից ավելի երաժիշտները չեն ներկայացել: Ինչու է նվագախումբը նման քայլի դիմել, դեռեւս պաշտոնապես չի մեկնաբանվում: Խոսակցություններ կան, որ բոյկոտը կազմակերպել են վերջերս աշխատանքից ազատված Օպերայի վարչական մասի աշխատակիցները, որոնցից երեքը՝ փոխտնօրեն:
Խնդրով զբաղվում է մշակույթի նախարարությունը, նախարար Արմեն Ամիրյանը հանդիպումներ է ունեցել Օպերայի գեղարվեստական ղեկավարի, փոխտնօրենների ու նվագախմբի անդամների հետ:
Սերժ Սարգսյանն այսօր աշխատանքային այցով մեկնել է Ղազախստան: Աստանայում նա մասնակցելու է «Աստանա Էքսպո 2017» միջազգային մասնագիտացված ցուցահանդեսի բացմանը: Հայաստանը նույնպես ներկայացված է ցուցահանդեսին:
Նախօրեին ոստիկանությունը դիտարժան օպերացիա է իրականացրել Կիեւյան փողոցում: Կանգնեցրել է շարասյունով երթեւեկող մեքենաները, դուրս բերել վարորդներին, պառկացրել գետնին, ոլորել ձեռքերը եւ բերման ենթարկել: Մեքենաների մեջ խուզարկության արդյունքում նաեւ զենքեր են հայտնաբերվել, որոնց օրինականությունը ստուգվում է: Լրատվամիջոցներում տարածված տեղեկությունների՝ մեքենաներում գտնվողները քրեական հեղինակություն Արտյոմ Կանեւսկոյի մարդիկ են եղել: Կանեւսկոյի անունը կապվում է «Դոն Պիպոյի» եւ «Վստրեչի Ապերի» դեմ ծրագրված մահափորձի հետ:
Հրազդանում նախօրեին տեղի ունեցած մահվան ելքով վրաերթի հեղինակը՝ Հրազդանի քաղաքապետի 17-ամյա որդին, մեկ օր անց ներկայացել է ոստիկանություն: Ըստ պաշտոնական հաղորդագրության՝ ի սկզբանե ոստիկանություն մեղայականով ներկայացել էր ոստիկանության, սակայն ժամեր անց պարզվել էր, որ իրականում վրաերթն իրականացրել է Հրազդանի քաղաքապետի անչափահաս որդին:
Քաղաքապետ Արամ Դանիելյանը NEWS.am-ի հետ զրույցում վստահեցրել է, որ իր որդին դեպքի վայրից փախուստի չի դիմել, փորձել է նույնիսկ առաջին օգնություն ցուցաբերել վրաերթի ենթարկվածին:
Հիշեցնենք, որ մահացածը Հրազդանի բնակիչ էր, 58-ամյա Վալերի Թորոսյանը 4 երեխաների հայ էր:
Սամվել Ալեքսանյանը հերքում է լրատվամիջոցներում տարածված տեղեկությունները, թե անցած շաբաթ Երեւանում կայացած իր դստեր հարսանիքին երգել է Ջասթին Թիմբերլեյքը, ինչի համար, ըստ մամուլի, Ալեքսանյանը 1 մլն դոլար էր վճարել: Լրագրողների հետ զրույցում պատգամավորը վստահեցրել է, որ դստեր հարսանիքին երգել են միայն հայ երգիչները, դրսից հրավիրված է եղել միայն Ալեքսանդր Սերովը:
Դոլարն ու եվրոն էժանացել են. ռուբլին կայուն է: Դոլարի փոխարժեքը կազմել է 482 դրամ, եվրոյինը՝ 539, բրիտանական ֆունտը՝ 614 դրամ, իսկ ռուբլին մնացել է անփոփոխ՝ 8,47 դրամ:
Հանրապետության տարածքում հունիսի 10-ին կեսօրից հետո շրջանների զգալի մասում սպասվում է անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանը հունիսի 11-ից կնվազի 2-4 աստիճանով, այնուհետեւ նույնքան կբարձրանա:
Մայրաքաղաքում հունիսի 10-ին սպասվում է անձրեւ եւ ամպրոպ: Երեւանում գիշերը կդիտվի +18+20, ցերեկը՝ +33+35 աստիճան տաքություն: