Շուկան ազատ է, ինքն իրեն պետք է կարգավորի, բաց դա չի նշանակում, որ պետք է Հայաստան մտնի ցանկացած որակի ապրանք, ցանկացած ճանապարհներով: Այս մասին, այսօր՝ հունիսի 10-ին, Կասյան փողոցում վերաբացված գյուղատնտեսական տոնավաճառում լրագրողների հետ զրույցում նշել է ՀՀ գյուղատնտեսության նախարար Իգնատի Առաքելյանը՝ անդրադառնալով հայկական շուկայում հայտնվող մթերքներին, որոնք հաճախ թուրքական կամ ադրբեջանական են լինում:
Նրա խոսքով, եթե ամեն բան օրինականության սահմաններում է եւ շուկայական հարաբերությունների դրված քաղաքականության սահմաններում է, ուրեմն ամեն ինչ նորմալ է. «Բայց եթե մենք մրցակցային չենք ներմուծվողի հետ, այստեղ ես մեր դերը տեսնում եմ: Պետք է տեսնենք, թե ինչն է խանգարում, որ լինենք մրցակցային, որովհետեւ Հայաստանի բնակլիմալական պայմաններով մենք ցանկացած մթերքի դեպքում կարող ենք լինել ավելի արդյունավետ: Ուղղակի պետք է հասկանանք, թե որոնք են մեր թույլ կետերը»,-ընդգծեց նախարարը:
Ավելի վաղ NEWS.am-ը հայտնել էր, որ այսօր՝ հունիսի 10-ին, Կասյան փողոցում վերաբացվել է գյուղատնտեսական շուկան: Գյուղնախարար Իգնատի Առաքելյանը այցելել է շուկա, գնումներ կատարել, զրուցել գյուղացիների հետ, պատասխանել լրագրողների հարցերին:
