Հայաստանը բարձր է գնահատում ԵԱՀԿ Մինկսի խմբի շրջանակում Ռուսաստանի ջանքերը՝ ուղղված արցախյան հակամարտության կարգավորմանը։ Այս մասին երեկ երեկոյան հայտարարեց ՀՀ ԱԳ նախարար Էդվարդ Նալբանդյանը՝ Սպենդիարյանի անվան օպերայի եւ բալետի ազգային ակադեմիական թատրոնում Ռուսաստանի օրվան նվիրված ելույթում։
Նրա խոսքով՝ հենց Ռուսաստանի շնորհիվ 1994 թվականի մայիսին արցախյան հակամարտության գոտում ստորագրվեց հրադադարի անժամկետ համաձայնագիրը, ինչը հնարավորություն տվեց սկսել խաղաղ կարգավորման շուրջ բանակցությունները։ Եվ հիմա պաշտոնական Երեւանը բարձր է գնահատում ԵԱՀԿ Մինսկի խմբի շրջանակում Ռուսաստանի խաղաղարար ջանքերը, որոնք նա գործադրում է՝ անկախ Ադրբեջանի ապակառուցողական դիրքորոշումից։
Նալբանդյանը նշեց, որ Հայաստանի եւ Ռուսաստանի միջեւ առկա քառորդ դարի դիվանագիտական հարաբերությունների ընթացքում երկրների ղեկավարների ավելի քան 100 հանդիպում է տեղի ունեցել, ինչը եւս մեկ անգամ խոսում է դրանց առանձնահատուկ բնույթի մասին։ ԱԳ նախարարը հատկապես շեշտադրեց Երկրորդ աշխարհամարտին Ռուսաստանի եւ Հայաստանի ժողովուրդների մասնակցությունը, մշակույթի ու արվեստի ոլորտում ընդհանուր արժեքները։
Ըստ Նալբանդյանի՝ մեծ նշանակություն ունի նաեւ տնտեսական համագործակցության զարգացումը։ Այս առումով բավական է նշել, որ Հայաստանում ներկայում ռուսական կապիտալով ավելի քան 2000 ձեռնարկություն է գործում։ «Հայաստանում միշտ ուրախ են եղբայրական Ռուսաստանի հաջողություններին, մենք վստահ ենք, որ հայ-ռուսական դաշնակցային հարաբերություններն այսուհետ նույնպես կզարգանան ու կխորանան»,- եզրափակեց Էդվարդ Նալբանդյանը։