Մոտ ապագայում Մերձավոր Արեւելքում քրդական պետություն կստեղծվի։ Այս մասին հունիսի 12-ին լրագրողների հետ հանդիպման ժամանակ ասաց ՀՀ Գիտութունների ակադեմիայի Աերեւելագիտության ինստիտուտի տնօրեն, թուրքագետ Ռուբեն Սաֆրաստյանը։
Նրա խոսքով՝ դա անդառնալի գործընթաց է։ «Մենք մեծ ու բարդ գործընթացի ականատեսներ ենք դառնում։ Դա Մերձավոր Արեւելքում քրդական պետության ստեղծումն է։ Այդ գործընթացը շարունակվում է եւ կշարունակվի մի քանի տարի»,-նշեց Սաֆրաստյանը։ Ըստ նրա՝ Իրաքի հանրաքվեն կարող է տեղի ունենալ կամ չունենալ, սակայն կարեւոր է, որ գործընթացը շարունակվում է։ «Աշխարհաքաղաքական տեսանկյունից դա Մերձավոր Արեւելքում ամենակարեւոր գործընթացն է։ Մերձավոր Արեւելքը տարբեր ուժային կառույցների շահերի բախման կենտրոնում է»,- ընդգծեց թուրքագետը։ Նա հավելեց, որ Քրդական պետությունը կունենա մեծ տարածք, մեծ թվով ազգաբնակչություն եւ հարուստ բնական ռեսուրսներ, ներառյալ՝ էներգետիկ ռեսուրսները, ինչը կհանգեցնի տարածաշրջանում նոր բախումների։
Ավելի վաղ Իրաքի Քուրդիստանի նախագահի օգնականը հայտարարել է, որ 2017 թվականի սեպտեմբերի 25-ին անկախության հանրաքվե տեղի կունենա։ Իրաքյան Քուրդիստանն ինքնավարություն է Իրաքի կազմում, կարգավիճակն ամրագրված է երկրի Սահմանադրությունում։