«Սասնա ծռեր» խմբի անդամ Վարդան Գերավետյանի մոտ առողջական լուրջ խնդիրներ են առաջացել: Այս մասին այսօր՝ հունիսի 12-ին, NEWS.am-ի հետ զրույցում ասաց նրա շահերի պաշտպան Դավիթ Գյուրջյանը: Նա նշեց, որ իր պաշտպանյալի մոտ հայտնաբերվել է խպիպ եւ մեկ այլ նորագոյացություն, որի բնույթը դեռեւս պարզված չէ:
«Մի քանի օր առաջ նա գանգատվում էր կոկորդի հատվածում ցավերից, մենք դիմեցինք ՔԿՀ՝ համապատասխան ստուգում իրականացվեց եւ պարզվեց, որ կա նորագոյացություն՝ կիստոզ, որի բնույթը դեռեւս պարզված չէ»,- ասաց նրա պաշտպան Դավիթ Գյուրջյանը:
Պաշտպանի խոսքով, արդեն դիմել է ՔԿՀ, որպեսզի անհապաղ քայլեր ձեռնարկվեն՝ նորագոյացության բնույթը պարզելու համար, սակայն, մեկ շաբաթ անց, դեռ ոչ մի քայլ չի ձեռնարկվել:
«Սա շ ատ հրատապ հարց է, այսպիսի դեպքերում հերթագրման չեն սպասում, պետք է անհապաղ քայլեր ձեռնարկվեն ստուգման համար, սակայն, դեռ ոչինչ չի արվում: Պատկերացնում եք նորագոյացությունը ինչ երեւույթ է, օրերի հարցն է նույնիսկ վճռորոշ լինում»,-ասաց նա::
Դավիթ Գյուրջյանի խոսքով, Վարդան Գերավետյանը ստուգումն անցել է Ան «Դատապարտյալների հիվանդանոց» ՔԿՀ-ում, իսկ մինչ այդ «Նուբարաշեն» ՔԿՀ-ում Վարդան Գերավետյանին հետազոտել է վիրաբույժը. «Վիրաբույժը եկել էր ստուգման, խցից պատուհանի միջով ընդամենը անցկացնելով իր ձեռքը, շոշափելով փորձել էր ախտորոշում կատարել»: