Ռուսական հայտնի Ա. Վ. Ալեքսանդրովի անվան երգի եւ պարի համույթը Ռուսաստանի օրվա առթիվ համերգով ելույթ է ունեցել Երեւանի Ռուս-հայկական համալսարանում: Համույթը նախկինում համալսարան այցելել է, սակայն այս անգամ բեմ է բարձրացել նորացված կազմով:
Արտիստների հայտնվելու առաջին պահից հանդիսատեսը դահլիճում նրանց հետ երգել է վաղուց ծանոթ երգերը՝ «Սմուգլյանկա», «Ալյոշա», «Օչի չորնիե», «Տրի տանկիստա», «Սեւաստոպոլսկիյ վալս»: Ելույթները հերթափոխվել են պարերով եւ ժողովրդական նվագարանների կատարումներով:
Ալեքսանդրովցիները ունկնդրին ուրախացրել են նաեւ հայերեն երգերով: Կատարումների թվում էին՝ «Մայրիկ», «Հայաստան», Իմ Հայաստան» ստեղծագործությունները:
Վերջում հնչել է «Կատյուշա» երգը: Ավանդույթի համաձայն՝ համույթը խնդրել է դահլիճին վերջին երգը միասին կատարել:
Համերգին մասնակցել են Ռուսաստանի դեսպանատան եւ տարբեր կազմակերպությունների ներկայացուցիչներ, նաեւ համալսարանի ռեկտոր Արմեն Դարբինյանը:
Ա. Վ. Ալեքսանդրովի անվան երգի եւ պարի համույթը նոր կազմով առաջին անգամ ելույթ է ունեցել ընթացիկ տարվա փետրվարին: Հիշեցնենք, որ Սոչիի շրջանում դեկտեմբերի 25-ին տեղի ունեցած ավիաաղետի հետեւանքով զոհվեց 92 մարդ, որոնց թվում՝ համույթի 64 արտիստ: