Այսօր կայացել է Երեւանի նորընտիր քաղաքապետի երդման արարողությունը: Տարոն Մարգարյանը երդվել է նախագահի, Ամենայն Հայոց կաթողիկոսի, բազմաթիվ պաշտոնյաների ներկայությամբ:

Արարողության ընթացքում ունեցած ելույթում նախագահ Սերժ Սարգսյանը վստահություն է հայտնել, որ ավագանիում մանդատ ստացած քաղաքական ուժերը կկարողանան մի կողմ թողնել տարաձայնություններն ու աշխատել հանուն Երեւանի: Մայրաքաղաքում նախագահը բազմաթիվ խնդիրներ է տեսնում՝ տրանսպորտ, աղբահանություն, համատիրություններ: Բայց վստահ է, որ դրանք քայլ առ քայլ կլուծվեն: Տարոն Մարգարյանը, ըստ նախագահի, պետք է օր ու գիշեր աշխատի, հիասթափեցնելու իրավունք պարզապես չունի:

Ավագանիում մանդատներ ստացած «Ելք» դաշինքի անդամները մասնակցել են արարողությանը, իսկ «Երկիր Ծիրանի»-ն որոշել է այլընտրանքային նիստ գումարել ու քննարկել քաղաքի խնդիրները: Զարուհի Փոստանջյանը լրագրողներին նույնպես հրավիրել է ներկա գտնվել իրենց նիստին:

Տարոն Մարգարյանին շնորհավորելու եկած վարչապետին լրագրողները հարցրել են իր հնարավոր հրաժարականի եւ Սերժ Սարգսյանի հետ լարված հարաբերությունների վերաբերյալ լուրերի մասին: Կարեն Կարապետյանը վստահեցրել է, որ հրաժարական տալու մտադրություն չունի, իսկ նախագահի հետ հարաբերությունների մասին հակիրճ է պատասխանել: Կարեն Կարապետյանը նաեւ քաղաքապետի պաշտոնում աշխատելու փորձ ունի: Հնարավո՞ր է, արդյոք, քաղաքապետի աշխատավարձով, Տարոն Մարգարյանի նման, հարստություն կուտակել:

Քաղաքապետի երդման արարողությանը մասնակցելու եկած «ՍԱՍ Գրուպ»-ի սեփականատեր Արտակ Սարգսյանը հակված չէր զրուցել լրագրողների հետ: Խոստացել է նրանց հետ զրուցել արարողությունից հետո, բայց Սարգսյանին հարցեր տալ այդպես էլ չի հաջողվել:

Երեւանի քաղաքապետարանի հնաբնակներից Կամո Արեյանը լրագրողների հետ զրուցել է, բայց հարցերին կտրուկ է պատասխանել: Նրան հունից հանել է հատկապես երեւանցիների համար շատ ցավոք՝ տրանսպորտի հարցը: Տրանսպորտի վիճակը մայրաքաղաքի թիվ մեկ խնդիրն է համարում նաեւ պատգամավոր Սամվել Ալեքսանյանը, բայց հավատում է նորընտիր քաղաքապետի խոստմանը, որ շուտով հարցը կլուծվի:

Ժամանակին քաղաքապետարանը ղեկավարած Գագիկ Բեգլարյանն էլ իր պաշտոնավարման տարիներն է հիշել եւ հույս հայտնել, որ այդ տարիներին մեկնարկած բարեփոխումները նույնքան սահուն ու առանց սթրեսների կշարունակվեն: Լրագրողները հետաքրքրվել են, թե ինչով է հիմա զբաղվում նախկին պաշտոնյան: Ասել է՝ բիզնեսով, բայց այլ մանրամասներ հայտնել չի ցանկացել:

Մոսկվայում կազմակերպված հակակոռուպցիոն ակցիան վերածվել է անկարգությունների եւ հանգեցրել ձերբակալությունների: Ժամեր առաջ ձերբակալվել է ակցիայի կազմակերպիչ, ընդդիմադիր գործիչ Ալեքսեյ Նավալնին, իսկ ավելի ուշ ռուսական աղբյուրները հաղորդել են ավելի քան 400 մարդու ձերբակալության մասին: Ականատեսների պնդմամբ՝ ոստիկանությունը շարունակում է մարդկանց ձերբակալել, այդ թվում՝ նրանց, ովքեր «ոչ մի կարգախոս չեն վանկարկել եւ պաստառ չեն բռնել»: Իրավապահները շրջապատել են Պուշկինի հրապարակը: Շուրջ 300 մարդ էլ ձերբակալվել է Սանկտ Պետերբուգում անցկացված ակցիայի ընթացքում: Ցույցեր են անցկացվել Ռուսաստանի մի քանի այլ քաղաքներում եւս:

Հրազդանի բազմաբնակարան շենքերից մեկում այսօր պայթյուն է տեղի ունեցել: Պատճառը գազն է եղել: Պայթյունի պահին տանը եղել է տարեց կին՝ թոռնիկի հետ: Նրանք հասցրել են դուրս գալ բնակարանից, ինչից հետո տանը հրդեհ է բռնկվել: Նախնական տվյալներով՝ տունն ամբողջությամբ այրվել է:

Իսկ օրերս առաջ 58-ամյա տղամարդուն մահացու վրաերթի ենթարկած Հրազդանի քաղաքապետի անչափահաս որդու նկատմամբ որպես խափանման միջոց ընտրվել է չհեռանալու մասին ստորագրությունը: 16-ամյա Ռազմիկ Դանիելյանը քաղաքապետ հորը սպասարկող Nissan-ով վրաերթի էր ենթարկել 58-ամյա Վալերի Թորոսյանին: Ծայրահեղ ծանր վիճակում հիվանդանոց տեղափոխված տուժածը մահացել էր:

Շառլ Ազնավուրը ցանկանում է, որ իր Pour toi Arménie երգը Հայաստանի պետական օրհներգը դառնա: Շանսոնյեն հյուրընկալվել է ֆրանսիական ռադիոկայաններից մեկին ու պատմել Հայաստան այցելության, «Ազնավուր» հիմնադրամի մասին: Խոսելով օրհներգի մասին՝ Ազնավուրը նշել է, որ այժմյան օրհներգը գրեթե ոչինչ չի արտահայտում, հավելելով, որ Pour toi Arménie-ն, հնարավոր է, Հայաստանի նոր օրհներգը դառնա: Նա վստահեցրել է, որ դրան համաձայն է նաեւ նախագահ Սերժ Սարգսյանը:

Թբիլիսիում անցկացված ըմբշամարտի միջազգային մրցաշարում Արթուր Ալեքսանյանի մրցելույթի ժամանակ միջադեպ է գրանցվել: Մեր օլիմպիական չեմպիոնը 3 տպավորիչ հաղթանակ տանելուց հետո դուրս է եկել 98 կգ քաշային կարգի եզրափակիչ: Վրացի Ռեւազ Նադարեիշվիլիի հետ գոտեմարտի ավարտից 50 վայրկյան առաջ մրցագորգի հարեւանությամբ քաշքշուկ է սկսվել: Արթուր Ալեքսանյանը մի պահ հեռացել է մրցագորգից, իսկ մրցավարները հաղթանակը վրացի ըմբիշին են շնորհել:

Արթուրի անձնական մարզիչ Գեւորգ Ալեքսանյանը մեր թղթակցին պատմել է, որ մեր մարզիկը գորգից հեռացել է՝ հայերի եւ վրացիների միջեւ ծագած վիճաբանության մասնակիցներին հանդարտեցնելու համար, այլապես այն վատ ավարտ կունենար: Հայաստանի թիմի մարզիչները փորձել են բողոքարկել որոշումը, բայց ապարդյուն: Գեւորգ Ալեքսանյանի խոսքով՝ մրցավարն ազգությամբ թուրք էր, այդ պատճառով կողմնակալ վճիռ կայացվեց: Ասում է՝ այս հարցին պետք է լուծում տալ, հայ մարզիկներն ու մարզիչներն անպաշտպան են միջազգային ասպարեզում: Արդյունքում Արթուր Ալեքսանյանը որակազրկվել է, նաեւ զրկվել արծաթե մեդալից: Հավելենք, որ Թբիլիսիում կայացած ըմբշամարտի միջազգային մրցաշարում Հայաստանի ներկայացուցիչները նվաճել են 6 մեդալ. 2 ոսկե, 2 արծաթե եւ 2 բրոնզ:

Դոլարն ու եվրոն թանկանում են: Դոլարի փոխարժեքն այսօր կազմել է 482 դրամ, եվրոյինը՝ 541, ռուբլունը՝ 8 դրամ 45 լումա, ֆունտինը՝ 612 դրամ:

Հունիսի 13-ին հանրապետության հյուսիսային շրջաններում սպասվում է կարճատեւ անձրեւ եւ ամպրոպ, առանձին վայրերում հնարավոր է կարկուտ: Օդի ջերմաստիճանը 2-3 աստիճանով կբարձրանա: Երեւանում վաղը տեղումներ չեն սպասվում: Մայրաքաղաքում գիշերը կդիտվի +18+20, ցերեկը՝ +33+35 աստիճան տաքություն: