Այս պահին դեռեւս տեղեկություններ չկան Մոսկվա-Երեւան ուղերթի ավտոբուսի վթարի հետեւանքով տուժողների քաղաքացիության վերաբերյալ: Այս մասին NEWS.am-ի թղթակցի հետ զրույցում ասաց Ռուսաստանում Հայաստանի դեսպանատան մամուլի քարտուղար Լեւոն Թորգոմյանը:
«Ամեն դեպքում, երկու տուժողները մարմնական թեթեւ վնասվածքներ են ստացել: Մի երեխայի մոտ թեւն է կոտրվել: Նրանք բոլորը անհրաժեշտ բժշկական օգնություն են ստացել եւ հիվանդանոցից արդեն դուրս են գրվել»,- նշեց դեսպանատան ներկայացուցիչը՝ հավելելով, որ տեղեկություններ են հավաքում մյուս ուղեւորների վիճակի մասին:
Ինչպես ավելի վաղ News.am-ը հայտնել է, հունիսի 13-ի առավոտյան Վորոնեժի մարզում Մոսկվա-Երեւան երթուղով ընթացող ավտոբուսը ջրատարն է ընկել: Ճանապարհային պատահարի հետեւանքով 3 մարդ տուժել է, այդ թվում՝ 2 երեխա: Միջին ծանրության մարմնական վնասվածքներ ստացած տուժողներին տեղափոխել են Բոգուչարի հիվանդանոց: Լուծվում է ավտոբուսի ուղեւորներին հյուրանոցում տեղավորելու հարցը մինչեւ հաջորդ ավտոբուսի ժամանումը՝ նրանց նշանակման վայրեր տեղափոխելու համար:
