Հայաստանը կարող է միաժամանակ լինել ՆԱՏՕ-ի հուսալի գործընկերը ու ՀԱՊԿ լիարժեք անդամ։ Այս մասին NEWS.am–ի թղթակցի հետ զրույցի ժամանակ Երեւանում ասել է Հարավային Կովկասի ու Կենտրոնական Ասիայի տարածաշրջանում ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապպատուրայը։
Այն հարցին, թե ինչպես նա կբնութագրեր Հայաստան- ՆԱՏՕ համագործակցությունը՝ հաշվի առնելով ՀԱՊԿ-ին Հայաստանի անդամակցությունը, Ապպատուրայը նշել է․ «Ես կցանկանայի երկու բան առանձնացնել։ Հայաստանը ոչ միայն ՀԱՊԿ մասնակից երկիր է, բայց եւ Ռուսաստանը Հայաստանի դաշնակիցն է։ Չնայած դրան, Հայաստանի ու ՆԱՏՕ-ի միջեւ մենք երկար պատմություն ունենք, լավ, հուսալի, գործնական համագործակցություն։ Եվ փաստացի առաջին բառերը, որոնք ես ժամանելուց հետո ասել եմ նոր դեսպանին, սրանք էին․ «Մենք որեւէ խնդիր չունենք»։ ՆԱՏՕ-ի գլխավոր քարտուղարի հատուկ ներկայացուցիչը շեշտեց, որ բոլոր կողմերի համար լավ ազդանշան է նաեւ այն, որ Հայաստանը միաժամանակ կարող է լինել ՆԱՏՕ-ի հուսալի գործընկերը ու ՀԱՊԿ լիարժեք անդամը։ «Հայաստանը կարող է իր ավանդը ներդնել Աֆղանստանում ու Կոսովոյում ՆԱՏՕ-ի գործողությանը, նաեւ մասնակցել ՀԱՊԿ ռազմական գործունեությանը։ Մենք համարում ենք դա կարեւոր ուղերձ այն մասին, որ համագործակցությունը հնարավոր է։ Եվ մենք կարիք չունենք կոշտ դիրքորոշման՝ ինքնիշխան պետությունների քաղաքական ընտրության հարցում»,- ամփոփել է Ջեյմս Ապպատուրայը։