Ղարաբաղա-ադրբեջանական շփման գծում հունիսի 16-ին եւ լույս 17-ի գիշերը հայկական զինված ուժերը չորս զոհ են ունեցել: Երեկ ուշ երեկոյան Արցախի պաշտպանության բանակը հայտնեց, որ երեկոյան՝ ժամը 18-ի սահմաններում, հակառակորդի կրակոցից 3 ժամկետային զինծառայող է զոհվել: Մեր տեղեկություններով՝ 2 զինծառայող էլ վիրավորվել է: Նրանց տեղափոխել են Երեւան՝ կենտրոնական զինվորական հոսպիտալ:
Սահմանային միջադեպի մասին պաշտպանության բանակը գրեթե մանրամասներ չի հայտնել: Տեղեկացրել է միայն, որ հակառակորդը հաստոցավոր հակատանկային նռնականետից կրակ է արձակել Պաշտպանության բանակի կենտրոնական ենթակայության զորամասերից մեկի պահպանության տեղամասի ուղղությամբ: Չի հաղորդվում, սակայն, թե շփման գծի կոնկրետ որ ուղղությամբ է հասցվել հարվածը:
Բոլոր զոհվածները 1997 թվականի ծնվածներ են, հաշված օրեր անց զորացրվելու էին: Զոհերից Արայիկ Մատինյանը Լոռու մարզի Շնող գյուղից էր, տան միակ արու զավակը. ավագ քույր ունի: Մյուս զոհը՝ Վարդան Սարգսյանը, Արագածոտնի մարզի Լուսագյուղ համայնքից էր, նույնպես ծնողների միակ որդին: Վարդանը երաժիշտ էր, ընդունվել էր Ռոմանոս Մելիքյանի անվան երաժշտական քոլեջի փողային նվագարանների բաժին: Նրանց հետ զոհված երրորդ զինծառայողը՝ Վիգեն Պետրոսյանը, Գեղարքունիքի մարզի Սեւան քաղաքից էր: Վիգենը Պետրոսյանների երեք որդիներից միջնեկն էր:
Չնայած կատարվածին՝ Արցախի պաշտպանության բանակը շփման գծում լարվածության աճի մասին չի հայտարարել: Այսօր առավոտյան հրապարակել է շփման գծի իրադրության ամենշաբաթյա ամփոփումը, որում ներկայացված հրադադարի ռեժիմի խախտումների թիվը նույնիսկ սովորականից ավելի քիչ է:
Ավելին, այսօր առավոտյան Հայաստանի պաշտպանության նախարարի մամուլի քարտուղար Արծրուն Հովհաննիսյանը Twitter-ի իր էջում գրել է, որ գիշերը շփման գծում համեմատաբար հանգիստ է անցել, կրակոցներ շատ չեն հնչել: Սակայն դրանից կարճ ժամանակ անց հայտնի դարձավ եւս մեկ զոհի մասին: Այս անգամ նշվել է հստակ ուղղությունը՝ հյուսիսային: Առավոտյան ժամը 10-ի սահմաններում հակառակորդի կրակոցից զոհվել է 20-ամյա Նարեկ Գասպարյանը: Նա ապրիլյան պատերազմի մասնակից էր: Նարեկը Երեւանից էր, մեկ ամսից զորացրվելու էր: Ծնողները սկսել էին վերանորոգել տունը՝ բանակից վերադարձող որդուն հավուր պատշաճի դիմավորելու համար:
Միայն չորրորդ զոհի մասին հայտնելուց հետո Պաշտպանության բանակը հայտարարեց, որ հակառակորդի գործողությունների պատասխանը լինելու է թիրախային եւ անհամարժեք:
Նշենք, որ զոհված բոլոր զինծառայողները սոցիալապես անապահով ընտանիքներից են: Զոհված զինծառայողների հոգեհանգիստը տեղի կունենա վաղը, նրանց հողին կհանձնեն իրենց բնակավայրերում:
Արցախի նախագահ Բակո Սահակյանը զոհված զինվորներին հետմահու պարգեւատրել է «Մարտական ծառայություն» մեդալով: