Երեւան-«Զվարթնոց» օդանավակայան կանոնավոր ավտոբուսային երթուղու մրցույթը, ամենայն հավանականությամբ, աշնանը կհայտարարենք։ Այս մասին NEWS.am-ի թղթակցին հայտնել է տրանսպորտի, կապի ու տեղեկատվական տեխնոլոգիաների նախարար Վահան Մարտիրոսյանը։
Հիշեցնենք, որ փորձնական ռեժիմով երթուղին սկսել է գործել հունիսի 14-ին՝ օդանավակայանից Հանրապետության հրապարակ երթուղով։ Ավտոբուսը գործում է շուրջօրյա, ամեն ժամը մեկ։
Տրանսպորտի նախարարությունը գործարկել է երթուղին վարչապետ Կարեն Կարապետյանի քննադատությունից հետո։ Կառավարության վերջին նիստերից մեկի ժամանակ վարչապետը քննադատել էր օդանավակայանի մոտ գործող տաքսիները։ Զբոսաշրջիկների ծանոթությունը Հայաստանի հետ չպետք է սկսվի չսափրված, հողաթափիկներով տաքսու վարորդներից, որոնք եռակի թանկ ուղեվարձ են պահանջում, ասել էր վարչապետը։
Նախարարի խոսքով, մասնավոր փոխադրող ընկերություններից մեկը՝ Elite Bus-ը, արդեն հետաքրքրություն է դրսեւորել երթուղին սպասարկելու հանդեպ։ «Ակնկալում ենք նաեւ այլ փոխադրողների արձագանքը։ Տեսնենք, թե ինչպես են նոր ավտոբուսները արդարացնելու իրենց ամռան ընթացքում, իսկ աշնանը մրցույթ կհայտարարենք»,- նշել է նախարարը։
Նրա խոսքով, այդ ավտոբուսներից օգտվող երեւանցիների ու հյուրերի քանակը աճում է ՝ առաջին օրը ՝ 86, երկրորդ օրը՝ 130, երրորդ օրը՝ մոտ 200։
Այն հարցին, արդյոք Տրանսպորտի նախարարությանը դիմել են տաքսու այն վարորդները, որոնցից ավտոբուսները հաճախորդներ են խլում, նախարարը պատասխանել է․ «Իհարկե, նման խոսակցություններ կան։ Բայց ցանկացած քաղաքակիրթ քաղաքում պետք է հնարավորություն լինի օդանավակայանից քաղաք հասնել ոչ միայն տաքսիով, այլեւ հասարակական տրանսպորտով»։