Լոնդոնում Grenfell Tower բնակելի տանը հունիսի 14-ին տեղի ունեցած հրդեհից հայ ընտանիք է հրաշքով փրկվել:
Today-ին տված հարցազրույցում հայ Մեսրոպ Կասեմջյանը պատմել է, թե ինչպես է օգնել իր 68-ամյա ազգականուհուն եւ միասին դուրս եկել հրդեհվող շենքից:
«Շենքը մոմի պես սկսեց այրվել: Ֆիլմ էի դիտում, երբ տեսա, որ հրդեհ է բռնկվել»,- պատմել է նա:
Մեսրոպն ու ընկերուհին արագ արթնացրել են իր հորաքրոջն ու դուրս եկել բնակարանից: Նշենք, որ Կասեմջյանները բնակվում էին շենքի 17-րդ հարկում:
Հիշեցնենք, որ բազմաբնակարան շենքում հրդեհի հետեւանքով 70 մարդ է մահացել: Հրդեհը սկսվել էր ներքեւի հարկերից, որից հետո արագ տարածվել վերեւ, ինչի հետեւանքով ոմանք հայտնվել էին կրակի ծուղակի մեջ։