Ռուսաստանի պաշտպանության նախարարությունն ԱՄՆ-ի կողմից սիրիական ինքնաթիռին հարվածելուց հետո դադարեցնում է Սիրիայի հարցով երկկողմ հուշագրի շրջանակում Պենտագոնի հետ համագործակցությունը։ Այս մասին ասվում է գերատեսչության մամուլի հաղորդագրությունում։
«Ռուսաստանի պաշտպանության նախարարությունը հունիսի 19-ից դադարեցնում է ամերիկյան կողմի հետ փոխգործակցությունը՝ Սիրիայում միջադեպերը կանխելու եւ ավիացիայի թռիչքների անվտանգությունն ապահովելու մասին հուշագրի շրջանակում։
Ամերիկյան հրամանատարությունից պահանջում ենք մանրակրկիտ հետաքննություն անցկացնել, ինչպես նաեւ ներկայացնել դրա արդյունքները։ Սիրիայում Ռուսաստանի ռազմական գործողությունների շրջանակում ցանկացած ինքնաթիռներ կուղեկցվեն ՀՀՊ համակարգերով։
Սիրիայի երկնքում ռուսական ավիացիայի՝ մարտական հանձնարարություններ կատարելու շրջաններում Եփրատ գետից արեւմուտք հայտնաբերված ցանկացած օդային օբյեկտ՝ ներառյալ միջազգային կոալիցիայի ինքնաթիռներն ու անօդաչու թռչող սարքերը, կուղեկցվեն ռուսական հակահրթիռային պաշտպանության ցամաքային եւ օդային միջոցներով՝ որպես օդային թիրախներ»,- ասվում է մամուլի հաղորդագրությունում։
