Հայաստանի կառավարությունը կշարունակի ղարաբաղյան հակամարտության խաղաղ կարգավորմանն ուղղված քայլերը, մասնավորապես՝ ժողովուրդների ինքնորոշման իրավունքի հիման վրա։ Այս մասին ասվում է Հայաստանի կառավարության ծրագրում, որը պետք է ներկայացվի Ազգային ժողովի քննարկմանը:

Արտաքին քաղաքականության ոլորտում ծրագրվում է խորացնել դաշնակցային հարաբերությունները Ռուսաստանի հետ եւ մասնակցել Եվրասիական տնտեսական միության կարգավորիչ մեխանիզմների ստեղծմանը։ Նախատեսվում է զարգացնել ԱՄՆ-ի հետ գործընկերությունը, խորացնել հարաբերությունները հարեւան Վրաստանի եւ Իրանի հետ։ Հայաստանը նախկինի պես պատրաստ է Թուրքիայի հետ հարաբերությունների կարգավորման, բայց առանց նախապայմանների։

Նախատեսվում է նաեւ խորացնել համագործակցությունը ՀԱՊԿ-ի շրջանակում, ինչպես նաեւ շարունակել քաղաքական երկխոսությունն ու ՆԱՏՕ-ի հետ անհատական գործընկերության գործողությունների ծրագիրը։

2017-2022 թվականներին ծրագրվում է հստակեցնել համահայկական գերակա խնդիրները, իսկ մինչեւ 2018 թվականի ավարտը մշակել պրոֆեսիոնալ ընկերակցությունների (բժիշկներ, իրավաբաններ եւ այլն), սփյուռքահայերի աջակցության ռազմավարություն։ Նկատենք, որ Սփյուռքի նախարարությունը, որը պետք է ձեւակերպեր այդ խնդիրները, գործում է 2008 թվականից։

Պաշտպանության ոլորտում մինչեւ 2020 թվականի ավարտը ծրագրվում է ստեղծել նորարարական համակարգ եւ ամրապնդել Պաշտպանության նախարարության կապերը բուհերի հետ՝ ըստ անհրաժեշտ մասնագիտությունների։ Մինչեւ 2020 թվականի ավարտն էլ կատարելագործվելու է մարտական հերթապահության դիրքերի զինումը՝ անձնակազմի անվտանգությունը բարձրացնելու նպատակով։