Տուն չեմ կառուցել, ծառ չեմ տնկել, բայց դիլիջանյան ջուրը ես եմ ճանաչված դարձրել։ Հայտնի վրացի կոմպոզիտոր Գիա Կանչելին հունիսի 19-ին Երեւանում մամուլի ասուլիսի ժամանակ պատմել է «Միմինո» ֆիլմի հետ կապված հայտնի պատմությունը։
Կանչելիի խոսքով Գեորգի Դանելիայի «Միմինո» կատակերգության հնչունավորման ժամանակ ինքն անցնում էր «Մոսֆիլմի» միջանցքով։ «Այդ պահին մշակում էին ջրի վերաբերյալ հայտնի դրվագը («Մեզ մոտ Դիլիջանում, խոհանոցում ծորակը բացում ես, ջուր է հոսում, աշխարհում երկրորդ տեղն է զբաղեցնում»-մեջբերում ֆիլմից, խմբ․)։ Քանի որ Ֆրունզիկը Լենինականում է ծնվել, նա Դանիելայի հետ պայմանավորվել էր Լենինականը հիշատակել։ Ես Դանելիային խնդրեցի միջանցք դուրս գալ ու նրան ասացի «Գիո, Լենինականը ի՞նչ կապ ունի։ Դու գիտես, չէ՞, որ իմ սիմֆոնիաներից 6-ը ես Դիլիջանում եմ գրել։ Բացի դրանից «Լենինական» բառի մեջ կա «Լենին» անունը, ինչը լրիվ ժամանակավոր է»։ Մի խոսքով, ես սկսեցի նրան համոզել, որ նա Ֆրունզիկին խնդրի Դիլիջանի անունը տալ»։
Որպեսզի ռեժիսորին վերջնականապես համոզի՝ Կանչելին իր վերնաշապիկն է տվել նրան։ «Ես այդ պահին սեւ վերնաշապիկով էի։ Դանելիան ասաց․ «Դու ինձ կտա՞ս քո վերնաշապիկը» ու ես նրան ասացի «Կտամ»։
Գիա Կանչելին այցելել է Երեւան իրեն նվիրված երաժշտական փառատոնի կապակցությամբ։ Փառատոնը, որի ընթացքում հնչում են մաեստրոյի ստեղծագործությունները, տեւելու է մինչեւ հունիսի 20-ը։