Արցախից Երեւան՝ զինվորական հոսպիտալ են տեղափոխել եւս մեկ վիրավոր զինծառայողի: 20-ամյա Յուրի Զաքարյանը հունիսի 17-ին գլխի հրազենային թափանցող վիրավորում է ստացել: Ժամկետային զինծառայողի կյանքին վտանգ է սպառնում, նա միացված է արհեստական շնչառության ապարատին:
Հունիսի 17-ին Երեւան էին տեղափոխվել եւս երկու վիրավոր զինծառայողներ: Նրանց վիճակը կայուն է: 20-ամյա Արմեն Վարդանյանը ականի պայթյունից գլխի շրջանում վիրավորում ունի, աչքի շրջանում վիրավորում ստացած մյուս զինծառայողը՝ 33-ամյա սպա Մյասնիկ Հովհաննիսյանը վիրահատվել է: Հովհաննիսյանի աչքերի վիրակապերն արդեն հանել են, բայց բժիշկները դեռ չեն շտապում կանխատեսել, արդյո՞ք հնարավոր կլինի լիարժեք վերականգնել զինծառայողի տեսողությունը: Հունիսի 16-ին եւ 17-ին զոհված չորս զինծառայողներին այսօր հուղարկավորել են: Ապրիլյան պատերազմի մասնակից Նարեկ Գասպարյանին հողին են հանձնել Երեւանում, Արայիկ Մատինյանին՝ Լոռու մարզի Շնող գյուղում, Վարդան Սարգսյանին՝ Արագածոտնի Լուսագյուղ համայնքում, Վիգեն Պետրոսյանին՝ Գեղարքունիքի մարզի Սեւան քաղաքում:
Իսկ Բաքվում տարածաշրջանային այցն ավարտած ԵԱՀԿ Մինսկի խմբի համանախագահներն ամփոփիչ հայտարարություն են տարածել: Դրա համաձայն՝ Ադրբեջանում բանակցությունների ընթացքում եռանախագահները խորը մտահոգություն են հայտնել հրադադարի վերջին խախտումների կապակցությամբ, ինչը Բաքու իրենց այցի նախօրեին շփման գծում զոհերի է հանգեցրել: Համանախագահներն Ադրբեջանի իշխանություններին լարվածության սրացումից խուսափելու կոչ են արել: Նույն կոչը հնչել է նաեւ Երեւանում եւ Ստեփանակերտում հանդիպումների ժամանակ:
Գործադիրն այսօր արտահերթ նիստում հավանություն է տվել կառավարության ծրագրին եւ այն ուղարկել Ազգային ժողով: Պատգամավորներն այն կքննարկեն հունիսի 21-ի նիստում: Վարչապետ Կարեն Կարապետյանը ծրագիրը հավակնոտ է որակել:
Տուլայի մարզում հունիսի 18-ին խոշոր վթարի հետեւանքով մեկ մարդ է զոհվել, 9 վիրավոր կա: Տուժածներից երեքը երեխաներ են: Բախվել են միկրոավտոբուսը եւ ԿԱՄԱԶ մակնիշի ավտոմեքենան: Երեւան-Մոսկվա երթուղու միկրոավտոբուսը պատկանում է «Քոչար տուր» ընկերությանը:
Մահացածը միկրոավտոբուսի վարորդներից է՝ Ռուսաստանի քաղաքացի Օթար Նասիրովը: Ընկերության տնօրեն Արամ Քոչարյանը NEWS.am-ին տեղեկացրել է, որ մյուս վարորդը՝ Կարապետ Մողրովյանը, չի տուժել: Հենց նա էլ վթարի ժամանակ ղեկին է եղել: Վարորդը պատմել է, որ կայանված ԿԱՄԱԶ-ը կտրուկ պոկվել է տեղից, Մողրովյանը չի կարողացել խուսափել բախումից, քանի որ կողքի երթեւեկելի գծով այլ մեքենաներ են ընթացել: Չի էլ հասցրել արգելակել, արդյունքում բախվել է ԿԱՄԱԶ-ին:
Հայաստան «ԻԳԼԱ»-ի տեղափոխման դեպքով հարուցված քրեական գործի նախաքննությունն ավարտվել է: Գործով կալանավորված Արցախի պաշտպանության նախկին նախարար Սամվել Բաբայանի շահերի պաշտպան Ավետիս Քալաշյանը մեզ տեղեկացրեց, որ նյութերն ուղարկվել են կողմերին՝ ծանոթանալու: Հայաստան տեղափոխված «ԻԳԼԱ»-ի արձակման խողովակը՝ «9M39» հրթիռով, հայտնաբերվել ու առգրավվել էր մարտի վերջին: ԱԱԾ-ի տեղեկություններով՝ համալիրի բաղկացուցիչ մասերը ձեռք են բերվել ու փոխադրվել Սամվել Բաբայանի հետ նախնական համաձայնությամբ եւ նրա պատվերով:
Ֆրանսիայի Ազգային ժողովում առաջին անգամ երեք հայ պատգամավոր կլինի: Նրանք մանդատ են ստացել հունիսի 18-ին կայացած խորհրդարանի ստորին պալատի ընտրությունների արդյունքում: Հայ թեկնածուներ առաջադրվել էին միայն երկրի նախագահ Էմանուել Մակրոնի «Առա՛ջ, Հանրապետություն» կուսակցությունից: Փարիզի Սեն Կլու արվարձանում հաղթել է Ժակ Մարիլոսյանը, Էր եւ Լուար դեպարտամենտում՝ Գիյոմ Կասբարյանը, իսկ Լիոնում՝ Դանիել Կազարյանը:
Արցախի փոքր ավիացիայի ձեւավորման առաջին քայլերն են արվում: Լեռնային Ղարաբաղում անցկացվել է «Արցախ էյր ֆեստ» առաջին փառատոնը: Նպատակ ունեն այս կերպ եւս նպաստել տուրիզմի զարգացմանը, բարձրացնել Արցախի փոքր ավիացիայի պոտենցիալի մասին իրազեկվածությունը, խթանել բիզնես նախագծերի նկատմամբ հետաքրքրությունը: Առաջին իսկ փառատոնին մեծ թվով օտարերկրացի զբոսաշրջիկներ են մասնակցել:
Հունիսի 19-ին դոլարը շարունակել է արժեզրկվել, եվրոն թանկացել է: Դոլարի փոխարժեքն արդյունքում կազմել է 481 դրամ, եվրոյինը՝ 538, ռուբլունը՝ 8 դրամ 29 լումա, ֆունտինը՝ 615 դրամ:
Հունիսի 20-ին հանրապետության հյուսիսային շրջաններում տեղումներ են սպասվում, առանձին վայրերում կարկուտի հավանականություն կա: Օդի ջերմաստիճանն էապես չի փոխվի: Երեւանում նույնպես հնարավոր է կարճատեւ անձրեւ եւ ամպրոպ: Մայրաքաղաքում գիշերը կդիտվի +19+21, ցերեկը՝ +33+35 աստիճան տաքություն: