ՀՀ նախագահ Սերժ Սարգսյանն այսօր՝ հունիսի 20-ին, ընդունել է Վրաստանի եւ ԽՍՀՄ ժողովրդական արտիստ, կոմպոզիտոր Գիա Կանչելիին, ով ժամանել է Հայաստան հունիսի 18-20-ը Երեւանում անցկացվող Կանչելիին նվիրված փառատոնին մասնակցելու նպատակով:
Ողջունելով անվանի կոմպոզիտորին՝ Հանրապետության նախագահը նշել է, որ Հայաստանում շատ սիրում ու բարձր են գնահատում Գիա Կանչելիի արվեստը, ինչի վկայությունն է նրան նվիրված երեւանյան փառատոնը: Այն, ըստ նախագահի, կոմպոզիտոր Կանչելիի երաժշտական ժառանգության նկատմամբ հայ հանդիսատեսի սիրո եւ ճանաչման լավագույն դրսեւորումն է:
Սերժ Սարգսյանն ընդգծել է, որ Հայաստանում մշտապես ուրախ են հյուրընկալելու ճանաչված կոմպոզիտորին, ով իր մեծ ներդրումն ունի հայ եւ վրացի ժողովուրդների բարեկամության ամրապնդման գործում:
Գիա Կանչելին նշել է, որ իր ստեղծագործական գործունեության մի զգալի ժամանակահատված ուղղակիորեն կապված է Հայաստանի հետ՝ իր յոթ սիմֆոնիաներից վեցը գրել է Դիլիջանի կոմպոզիտորների ստեղծագործական տանը եւ այդ կապակցությամբ երկար ժամանակ է անցկացրել Հայաստանում՝ ձեռք բերելով անկրկնելի ընկերներ հայ կոմպոզիտորների շրջանում: Անվանի մտավորականը ջերմությամբ է հիշել նրանց հետ հանդիպումներն ու շփումները՝ ընդգծելով, որ դրանցով մինչ այսօր հպարտանում է:
Նշելով, որ հայ-վրացական հարաբերություններն այսօր գտնվում են բավականին բարձր մակարդակի վրա, տարեցտարի առավել ամրապնդվում եւ խորանում են բարիդրացիական կապերը երկու ժողովուրդների միջեւ, զրուցակիցները համակարծիք են եղել, որ անհրաժեշտ է ավագ սերնդի ներկայացուցիչների, այդ թվում՝ անվանի մարդկանց մեծ բարեկամության օրինակների վրա շարունակել կրթել ու դաստիարակել երիտասարդ սերնդին՝ խրախուսելով ակտիվ շփումները մշակույթի ոլորտում: