Մոտ 200 մարդ է հավաքվել Բրյուսելի օկրուգներից մեկում, որպեսզի հարգեն Օսմանյան Թուրքիայում հայերի, հույների ու ասորիների ցեղասպանության զոհերի հիշատակը։
Արարողությունն անցել է հուշատախտակի մոտ, որը բացվել է Հայոց ցեղասպանության 100-րդ տարելիցին, հայտնում է Brussels Times-ը։
Բելգիահայերի ֆեդերացիայի ներկայացուցիչ Լյուկ Ատասի խոսքով սերունդները պետք է իմանան, թե ինչ է պատահել իրենց ծնողների ու տատիկ- պապիկների հետ։ «Այդ ողբերգությունը մեր ազգային ինքնության մասն է, ինչպես եւ մեր հավատը, լեզուն ու մշակույթը»,- նշել է նա, հավելելով, որ քրիստոնյաները նորից սպառնալիքի տակ են Մերձավոր արեւելքում, որտեղ նոր ցեղասպանության են ենթարկվում։
Ելույթ ունեցողները նշել են, որ Բելգիայի խորհրդարանը դեռ չի ճանաչել Ցեղասպանությունը։
«Մարդասիրական ժողովրդավարական կենտրոն» կուսակցության պատգամավոր Ժորժ Դապլեմանը նշել է․ «Այս հարցով քվեարկությունը 2015-ին ձախողվել է գլխավորապես Թուրքիայի ճնշման պատճառով։ Այդուհանդերձ, ես կշարունակեմ Ցեղասպանության ճանաչման համար պայքարը»։